म्यूजिक भिडियो अवार्डय् प्यंगू विधा थप
येँ – नेपालभाषा सांगीतिक ख्यलय् हे दकलय् अप्वः विधाय् अवार्ड लःल्हाइगु ‘नेपालभाषा स्टार म्युजिक भिडियो–११४०’य् प्यंगू विधा थप याःगु दु । नेपालभाषाया म्युजिक भिडियोय् हे न्हापांखुसी दकलय् अप्वः विधाय् अवार्ड लःल्हाइगु थुगु ज्याझ्वलय् मेगु प्यंगू विधा थप याःगु खः । संसार क्रियसनया ग्वसालय् जुइत्यंगु अवार्ड ज्याझ्वलय् मेगु थप प्यंगू विधाय् नं अवार्ड लःल्हायेगु निर्णय याःगु खः ।
संसार क्रियसनया प्रमुख स्वतन्त्र संसार महर्जनं बियादीगु जानकारीकथं अवार्ड ज्याझ्वःया निर्णायकमण्डलया आः नकतिनि च्वंगु मुँज्यां थप प्यंगू विधाय् नं अवार्ड बीगु निर्णय याःगु खः । थुकिया लिसें आः २३ गू विधाय् अवार्ड लःल्हाइगु जूगु दु । अवार्ड ज्याझ्वःया निंतिं आतकया दुने ५७ गू नेपालभाषाया म्युजिक भिडियो दर्ता जुइधुंकूगु जानकारी क्रियसनया प्रमुख महर्जनं बियादिल ।
नेपालभाषाया म्युजिक भिडियोय् दकलय् अप्वः विधाय् अवार्ड लःल्हायेगु धयातःगु अवार्ड ज्याझ्वलय् उत्कृष्ट म्येँ, म्येँ च्वमि, लय्चिनामि, संगीत संयोजक, मिसा मोडल, मिजं मोडल, नवोदित मिसा मोडल, नवोदित मिजं मोडल, म्येँ हालामि मिसा, म्येँ हालामि मिजं, नवोदित मिसा म्येँ हालामि, नवोदित मिजं म्येँ हालामि, नृत्य निर्देशक, म्युजिक भिडियो निर्देशक, रंग समिश्रण, समाः, वसः, रेकर्डिङ स्टुडियो, क्यामरा पर्सन, भिडियो सम्पादन, पब्लिक च्वाइस अवार्डलिसें लाइफ टाइम एचिभमेन्ट व जुरी अवार्ड लःल्हाइगु जूगु दु ।
थ्व हे झ्वलय् अवार्ड ज्याझ्वः सुथां लाकेया निंतिं प्रमोशन यायेकथं कलाकारतय् छगू मैत्रीपूर्ण फुटसल कासा नं याइगु जूगु दु । जावलाख्यलय् च्वंगु फुटसल मैदानय् अवार्डया प्रमोशनकथं फुटसल कासा यायेधुंकाः म्युजिक भिडियो अवार्ड यायेगु क्रियसनं जानकारी बिउगु दु ।
अवार्डया निंतिं दुहां वःगु म्युजिक भिडियोमध्ये उत्कृष्ट १० गू म्युजिक भिडियो नं ल्ययेगु जानकारी ज्याझ्वःया कजि सुरेन्द्र महर्जन तापाख्यःमिं जानकारी बियादीगु दु ।
LEAVE YOUR COMMENTS