१.८ किलोया मस्तिष्क ट्युमर अपरेशन यानाः लिकाल

भारतय् छम्ह मनूया छ्यनय् थानाच्वंगु १.८ किलोया ट्युमर अपरेशन यानाः लिकाःगु दु । वंगु फेबु्रअरी १४ कुन्हु मुम्बईया नायर अस्पलताय् थ्व अपरेशन जूगु खः । न्हय्घौया अपरेशन लिपा चिकित्सकतय् ट्युमर लिकायेत सफल जूगु खः ।

अस्पतालं थ्व अपरेशन पूवंक सफल जूगु निश्चित मजूतलेया निंतिं थ्व खँ गोप्य यानातःगु खः । आः विरामीया स्वास्थ्य बांलाना वयेवं थुकिया बारे जानकारी बिउगु खः । अस्पतालया कथं थ्व ट्युमर संसारया हे आःतकया दकलय् तग्वःगु मस्तिष्क ट्युमर जुइफु ।

‘आः वया स्वास्थ्यय् ध्यान बियाच्वनागु दु । तर व खतरामुक्त दु’ अस्पतालया स्नायु शल्यक्रिया विभागया प्रमुख डा. त्रिमूर्ति नाडकर्णीं बिबिसीयात धाःगु दु ।

भारतया उत्तर प्रदेशय् छगू पसः चले यानाच्वंम्ह सन्तलाल पालया मस्तिष्कय् वंगु स्वदँ न्ह्यवनिसें ट्युमर खने दयावःगु खः । थ्व ट्युमरया कारणं वं मिखां मखनेधुंकूगु दु । आः अपरेशन सफल जूगुलिं लिपा बुलुहुँ मिखाया दृष्टि नं लिहां वइगु चिकित्सकतय् आशा दु ।