ऐरी उपकप्तान

येँ – युवा ब्याट्सम्यान दीपेन्द्रसिंह ऐरी राष्ट्रिय क्रिकेट टिमया उपकप्तान जूगु दु । ऐरीयात सिंगापुर व ओमान भ्रमणया निंतिं उपकप्तान ल्यःगु खः । नेपालं सिंगापुरय् त्रिकोणात्मक टि २० शृङ्खला व ओमानय् न्यागू देय् दुथ्याःगु मैत्रीपूर्ण शृङ्खला म्हितेत्यंगु दु । थुगु धेंधेंबल्लाःया निंतिं म्हिगः प्रशिक्षक उमेश पटवाल व कप्तान पारस खड्कां झिंन्याम्हेसिया नां घोषणा याःगु खः ।

थ्व कासायात डिसेम्बरय् जुइगु झिंस्वक्वःगु दक्षिण एशियाली खेलकूदया निंतिं तयारी कासा कथं कयातःगु दु । नियमित उपकप्तान ज्ञानेन्द्र मल्लं थ्व मैत्रीपूर्ण कासा म्हितेमखु धाःगुलिं ऐरीयात उपकप्तानी यायेगु ह्वःताः चूलाःगु खः । मल्लं व्यक्तिगत कारणं थ्व कासा मम्हितीगु जूगु खःसा वया थासय् उपकप्तानया सम्भावित कासामित शरद भेषवाकर व वसन्त रेग्मीयात नं आराम बिउगु खः ।