ने. सं. ११४४ चौलाथ्व दशमी -

सञ्चयकोषया निक्षेप स्वंगू खर्बं च्वय्

येँ – आन्तरिक लगानीया निंतिं विश्वास यायेबहःगु संस्था कथं स्थापित जुया वनाच्वंगु कर्मचारी सञ्चयकोषं स्वंगू खर्ब ४५ अर्ब बराबरया वित्तीय स्रोतया परिचालन याना वयाच्वंगु दु । थ्यंमथ्यं खुगू लाख सञ्चयकर्तातय्सं लय्लय्पतिकं मासिक कोष कट्टा यानाः मुंकाच्वंगु रकम अप्वया वनाच्वंगु सन्दर्भय् लगानीया थीथी ख्यः व आयाम मालेगु निंतिं कोष क्रियाशिल जुयाच्वंगु दु ।

कोषय् थौंकन्हय् स्वंगू खर्ब गुंगू अर्ब ८५ करोड बराबरया मौज्दात दु । अथेहे ३१ अर्ब ४५ करोड जगेडा कोषय् दु । मेमेगु दायित्व व्यवस्था धाःसा प्यंगू अर्ब ३९ करोडया दु । कोषं स्वंगू खर्ब ४५ अर्ब व ६९ करोड कुल स्रोत व स्वंगू खर्ब ३८ अर्ब खुगू करोड बराबरया लगानी याना वयाच्वंगु दु ।

कोष नीस्वंगु ५८ दँ क्यंगु झ्वलय् मंग्लवाः सार्वजनिक याःगु विवरण कथं कोषय् सञ्चित ध्यबाय् ८.२५ प्रतिशत ब्याज बिया वयाच्वंगु दु । कोषं सञ्चयकर्तातय्त त्यासाय् ५३, परियोजना त्यासाय् १६, बैंकतय् मुद्दती निक्षेपय् २३ व मेमेगु क्षेत्रय् च्यागू प्रतिशत लगानी याना वयाच्वंगु दु ।

व्यक्तिगत विवरण (केवाइसी) फारम जायेकाः निगू लाख ५० हजार स्वयां मल्याक सञ्चयकर्तातय् विवरण अध्यावधि यायेधुनागु खँ कोषया प्रशासक तुलसीप्रसाद गौतमं धयादीगु दु । अथेहे निजमति किताबखाना, महालेखा नियन्त्रकया ज्याकू व नेपाल दूरसञ्चार कम्पनी लिमिटेडलिसे जूगु सम्झदारी सम्झौता कार्यान्वयन जुयाच्वंगु दु ।

नेपाल क्लियरिङ हाउसलिसे सहकार्य यानाः कोषपाखें पिहां वंगु त्यासा भुक्तानी चेकरहित याना वयाच्वंगु दु । थौंकन्हय् परीक्षणया रुपय् लागु यानाच्वंगु थ्व कार्यक्रमयात चालु आर्थिक दँ दुने कोषया फुक्कं कारोवारय् कार्यान्वयन हयेगु खँ धाःगु दु ।

सञ्चयकर्तातय्त फुक्क कथंया कारोवारया जानकारी एसएमएसपाखें बीगु प्रक्रिया नं सुरु जुइधुंकूगु जानकारी बिसें गौतमं न्हूगु नियुक्त जूपिं कर्मचारीतय्त राष्ट्रिय किताबखानापाखें कोषया परिचयपत्र नम्बर बीगु ज्या नं सुरु जुइधुंकूगु दु । कोषं थौंकन्हय् नीगू आयोजनाय् थःगु शेयर लगानी याःगु दु ।

१२ अर्ब ५० करोड तका बराबरया सरकारी ऋणपत्रयात निगूगु बजाःमार्फत विक्री यानाः उगु ध्यबा ताहाकःगु अवधि तकया निंतिं मुद्दती निक्षेपय् लगानी याःगु दु । थ्व निर्णयं कोषया प्रतिफलय् दँय् थ्यंमथ्यं ७५ करोड अप्वःगु दु । लगानीपाखें चूलाइगु कूल प्रतिफल मध्ये ९५ प्रतिशत स्वयां अप्वः ब्याज, मुनाफा व सामाजिक सुरक्षा सुविधाया रुपय् संचयकर्तातय्त हे बिया वयाच्वंगु दु ।

मुनाफामध्ये बछि ध्यबा सञ्चयकर्तातय् खाताय् जम्मा यानाबिउगु दु । बछि ध्यबा वेत कर्णाली सञ्चयकर्ता हाइड्रोपावर कम्पनीइ सञ्चयकर्ताया नामं शेयर लगानी यायेगु प्रयोजनय् निंतिं मुंकातःगु दु । आर्थिक दँ २०७४÷७५ व आर्थिक दँ २०७५÷७६य् २१ हजार सञ्चयकर्तायात १९ करोड ९७ लाख सामाजिक सुरक्षा सुविधा वितरण याःगु दु ।

कोषया वार्षिकोत्सवया झ्वलय् अर्थमन्त्री डा. युवराज खतिवडां कोषयात प्राथमिक बजार व ऋणपत्र खरिदया निंतिं छ्यलेगु तयारी सरकारं यानाच्वंगु खँ धयादिल । नागरिक लगानी कोषयात निगूगु बजारय् प्रवेश याकेगु तयारी जुयाच्वंगु खँ न्ह्यथँसें थौंकन्हय् धितोपत्र बजारय् सुचिकृत जुयाच्वंगु फुक्क धयाथें कम्पनीया नाफा अप्वयाच्वंगुलिं नवप्रवेश व निगूगु बजारय् लगानी यानाः उकियापाखें नाफा कम यायेगु निंतिं थ्व ई उपयक्त जूगु खँ वय्कलं धयादिल ।

पुँजी निर्माणया निंतिं कोषय् दुगु स्वंगू खर्ब स्वयां च्वय्या पुँजीयात परिचालन यात धाःसा उकिं पुँजी निर्माणया लिसें तःधंगु आयोजना न्ह्यःने न्ह्याकेत सहज जुइगु खँ वय्कलं धयादिल । वय्कलं धयादिल, ‘पुँजी निर्माण लिपा थप रोजगारीया अवसर सिर्जना जुइसा सञ्चकर्तात नं सुरक्षित जुइ ।’

थौंकन्हय् सरकारी निकायया स्वामित्वय् दुगु थीथी कोषय् कुल गार्हस्थ उत्पादनया २० प्रतिशत ति ध्यबा जम्मा जुयाच्वंगु तथ्य न्ह्यब्वयादिसें अर्थमन्त्री थ्व ध्यबायात थीथी क्षेत्रय् परिचालन यायेमाःगु आवश्यक्ता दुगु खँ धयादिल । वय्कलं सञ्चयकोष थेंज्याःगु तःधंगु कोषं मुद्रा बजारय् म्हिते मजिउ धासें मुद्रा बजारय् म्हिताः अस्थिरता हयेगु स्वयां दीर्घकालिन योजनाय् लगानी यायेमाःगु सुझाव बियादिल ।

वय्कलं धितोपत्र बजारय् न्हूगु लगानीकर्तातय् निंतिं आःया ई उपयुक्त जूगु खँ नं धयादिल । शेयरबजाः कुहां वनाच्वंगु जूगुलिं आःया ई नवप्रवेशीया निंतिं उपयुक्त ई जूगु वय्कःया बिचाः खः । सरकारं पुँजी बजाः सुधारया निंतिं थीथी ऐन कानुन हःगु व छुं छुं संशोधन प्रक्रियाय् यंकूगु व बजारमैत्री वातावरण दयेकूगु धासें अर्थमन्त्रीं लगानीया निंतिं उपयुक्त ई खः धयादीगु खः ।