मनमय्जुइ छवाःयंकंया क्षमता अभिवृद्धि तालिम क्वचाल

येँ – तारकेश्वर नगरपालिका मनमय्जुइ स्थानीयवासीतय्त लक्षित यानाः छवाःयंकं न्ह्याःगु क्षमता अभिवृद्धि तालिम क्वचाल । नेवाः ग्वाहालि पुचः फुसिंस्ख्यलं ग्वसाः ग्वःगु तालिमय् नवायेगु शैली व कलाया बारे तालिम बिउगु खः । तालिम समापन ज्याझ्वलय् नवासें नेवाः न्ह्यलुवालिसें पुचःया संरक्षक डा. महेशमान श्रेष्ठं हरेक नेपाःमियाके राजनीतिक चेतनाया विकास जुइमाःगु आवश्यक जूगु खँय् बः बियादिल ।

लिसें वयकलं सरकारया सरकारया समृद्ध नेपाल सुखी नेपालीया नारा साकार यायेत नं नागरिकया चेतनास्तरं ग्वाहालि याइ धयादिल ।
स्वनिगलय् देय्न्यंकंया मनूत मुंके हयेवं जक विकास जुइमखु धासें डा. श्रेष्ठं धयादिल, ‘न्हूगु सहरया निर्माण आःया आवश्यकता मखु, बरु ऐतिहासिक महत्वया सम्पदा व संस्कृतिया संरुक्षण यायेगु स्वयेमाः धयादिल ।

नेवाः राजनीतिक अभियानया नायः श्रीकृष्ण मानन्धरं ल्याय्म्हतय्के राजनीतिक चेतनास्तरया विकास जूसा हे जक नेतृत्वयात सचेत व खबरदारी याये फइ धयादिल । स्थानीय नासः चुकय् जूगु समापन याःगु खःसा उगु तालिम संचारकःमि केके मानन्धरं बियादीगु खः । अथे हे तालिमया संयोजन धर्म महर्जनं यानादीगु खः ।तालिमय् थीथी पेशाय् आवद्ध जुयाच्वंपिनिगु नं सहभागिता दुगु खः ।