आः नेपाल व खनालया भूमिका छु ? ओली व दाहालपाखें ताः ई हे पार्टी कब्जा यायेगु नीति

येँ – देय्या निगू तःधंगु वामपन्थी पार्टीत एमाले व माओवादी एकीकरण जुयाः एमाले अध्यक्ष केपी ओली व माओवादी अध्यक्ष पुष्पकमल दाहालपिंसं थःथःपिनि स्थान सुरक्षित यायेधुंकाः आः एमालेया मेपिं निम्ह वरिष्ठ नेतात माधव नेपाल व झलनाथ खनालया स्थान एवं भूमिका छु जुइ धइगु न्ह्यसः पिहां वःगु दु । विश्लेषकतय्सं धाः कथं ओली व दाहाल दथुइ आः जूगु एकीकरण थ्व छगू कार्यकाल ला न्ह्याइगु हे जुल, वयां लिपाया कार्यकाल नं वय्कःपिं निम्ह हे जानाः न्ह्याकीगु सम्भावना दु ।

निम्ह नेताया दथुइ आः जूगु सहमति धइगु मेगु कार्यकाल तक नं छम्हेस्यां सरकारय् व मेम्हेस्यां पार्टी कब्जा यानाः न्ह्याः वनेगु रणनीति अनुरुप निर्माण जूगु खः । थज्याःगु अवस्थाय् एमाले दुने केपी ओलीया समानान्तर हैसियत दुपिं पूर्व प्रधानमन्त्रीपिं माधव नेपाल व झलनाथ खनालया स्थिति छु जुइ धइगु न्ह्यसः पिहां वःगु खः । थुकी खनाल भावी राष्ट्रपति जुइ खनीगु लोभय् ओलीया पक्षधर खने दयाच्वंगु दु । अझ नं प्रधानमन्त्री जुइगु म्हगस खंकाच्वंम्ह नेपालं धाःसा पालंपाः सरकारय् वनेगु धकाः आः जूगु सहमतिया विरोध यानादीगु दु । न्हूगु एकीकृत पार्टीइ ओली व दाहाल मिले जुयाच्वंत्तले खनाल व नेपालं छुं याये मफइगु विश्लेषण नं पार्टी दुने याना हःगु दु ।