बेपत्ता व सत्य निरुपण अझं बेपत्ता!

आयोगया अध्यक्ष ल्यये मफयाः सिफारिस समिति कायल

येँ – देशय् शान्ति प्रक्रिया पूवनेवं गठन यायेमाःगु बेपत्ता छानबिन आयोग व सत्य निरुपण आयोग निक्वःखुसी गठन यायेगु लागिं सरकारयात तसकं थाकुयाच्वंगु दु । सरकारं थ्व स्वयां न्ह्यः गठन याःगु निगुलिं आयोगं ज्या याये मफुगुलिं भंग जूगु दुसा आः निक्वःखुसी आयोग गठन यायेगु लागिं छगू सिफारिस समिति नीस्वनातःगु दु ।

तर सिफारिस समितिं बिचाः यानातःगु नांयात पार्टीया नेतातय्सं स्वीकार मयाःगुलिं उकियात सिफारिस यानाः न्ह्याः वनेत थाकुयाच्वंगु खँ नं धाःगु दु । सत्य निरुपण आयोग व बेपत्ता छानबिन आयोगं याइगु ज्याखँपाखें अन्तर्राष्ट्रिय कानून समेत प्रभावित जुइगु जूगुलिं आः सरकारं गज्याःपिं मनूतय्त थुकिया अध्यक्ष दयेकी धइगु खँय् अन्तर्राष्ट्रिय चिउताः समेत ब्वलनाच्वंगु खँ सूत्रं धाःगु दु ।

यदि मानव अधिकार सम्बन्धी अन्तर्राष्ट्रिय मान्यतायात स्वीकार मयाइम्ह मनूयात अध्यक्ष दयेकल धाःसा उकिया प्यखेरं विरोध जुयाः उमिसं याइगु ज्यायात अन्तर्राष्ट्रिय मान्यता समेत मदयेफुगु खँ नं धाःगु दु । नां मालेत तसकं थाकुयाच्वंगु दुसां सिफारिस समितिया दुजः शर्मिला कार्कीं धाःसा आः भदौ २० गते तकया दुने समितिं नां सिफारिस याइगु खँ धयादीगु दु ।

तर थ्व नं अझं स्पष्ट मजूगु सूत्रया दावी दु । नां सिफारिस यायेगु लागिं समितिया दुजः विज्ञतय्थाय् स्वयां नं अप्वः दलया नेतातय्गु छेँय् वने मालाच्वंगु खँ नं सूत्रं धाःगु दु । नेतातय्सं नांयात कयाः सहमति व्यक्त याःगु जूसा ताः ई न्ह्यः हे सिफारिस जुइ धुंकीगु खँ नं धाःगु दु ।

नां बीगु जिम्मा निम्ह नेतातय्त ?
सत्य निरुपण व बेपत्ता छानबिन आयोगया अध्यक्ष लिसें मेपिं दुजःतय् नां सिफारिस यायेत थाकुयाच्वंगुलिं आः थुकिया जिम्मा सत्तारुढ दल नेकपाया निम्ह अध्यक्षपिं प्रधानमन्त्री केपी ओली व पुष्पकमल दाहालयात बिउगु खँ सीदुगु दु । वय्कःपिं निम्ह अध्यक्षतय्सं सहमति यानाः बिउगु नांयात हे सिफारिस समितिं पेश याइगु दावी नं सूत्रं याःगु दु ।

वय्कःपिनि दथुइ नं नांयात कयाः सहमति मजुयाच्वंगु दावी सूत्रया दु ।तथापि सिफारिस समितिं थःपिंत दलया नेतातय्सं नां बीगु धकाः वयाच्वंगु चर्चायात अस्वीकार याःगु दु ।

थ्व निगू आयोगया अध्यक्ष व दुजः जुइपिं मनूत विपक्षी नेपाली कांग्रेसयात नं स्वीकार्य जुइमाःगु खँ न्ह्यःने वयाच्वंगु दु । यदि आयोगं याःगु ज्याखँयात कांग्रेसं अस्वीकार यात धाःसा कन्हय् अन्तर्राष्ट्रिय रुपं नं उकियात स्वीकार याइगु वातावरण मदयेफुगु खँ धाःगु दु ।

सम्बन्धित बुखँ

LEAVE YOUR COMMENTS