नकली सायाःया हैरानी

म्हीग सापारुकुन्हु येँय् पिहां वःगु सायाः पर्वय् सकली स्वयां नं नकली सायाः अप्वः दुहां वयाः हैरान जुल । हुलया दथु दथुइ घुसे जूवःपिं थ्व नकली सायाःतय्सं अन इनाच्वंगु ध्यबा, बिस्कुट व मेमेगु नसाज्वलं लाका लाकाः तकं काः वःगु खः । खास यानाः मस्तय्त ख्वालय् रंग पाकाः, सायाः थेंज्याःगु लं पुकाः हयातःपिं थ्व फ्वगिंत अप्वः यानाः भारतीयत खः ।

थुमिसं यानाः सायाः वःपिंत नसात्वँसा इउँ वयाच्वंपिंत तसकं हैरान यानाबिल । थुमित हटे याना बी माल धकाः प्रहरीयात धाःगु खःसां प्रहरीं नकली सु खः, सकली सु खः जिमिसं नं धाये मफयाच्वन धासें पन्छे जू वन । आः मेगु जात्राय् थुमित चीका छ्वयेत पहल यायेमाःगु सुझाव श्रद्धालुतय्सं बिउगु दु । अज्याःपिं नकली सायाः वःपिनि छुं किपा थन न्ह्यब्वया –
(किपा ः सुजः मानन्धर)

हनुमानध्वाखा लागाय् मचायात थथे ख्वालय् रंग पाकाः मेम्ह मचां बुया हःपिं नं यक्व हे खने दत । थुमिसं मचायात न्ह्यःने तयाः थःपिंसं धाःसा झोला ज्वनीगु व उकी फः वनेगु ज्या याना जूगु खः ।

स्वदँ प्यदँ ति दुम्ह मचायात ख्वालय् ग्वाय् दयेकाः फ्वं वयाच्वंम्ह थ्व मिसां दुरु त्वंम्ह मेम्ह मचा नं बुयातःगु दु । थुपिं वहे थासय् चाःचाःहिलाः फ्वनाच्वंगु खः ।

छ्यनय् बःति थेंज्याःगु तपुलि पुना वःम्ह थ्व मचां पिने धोती सिनातःगु दुसां दुने पाइन्ट धाःसा बांलाक हे खनेदु । थुमिसं दान बियाच्वंगु ध्यबा तकं लाका काः जूगु खः ।

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन