घुम्ती सेवां यानाः कपाय् उद्योग संकटय्

येँ – उद्योगमैत्री वातावरण मदुगुलिं देय्न्यंकंया कपाय् उद्योग संकटय् लानाच्वंगु दु । नेपाल कपास व्यवसायी संघया आइतवाः जूगु न्हापांगु साधारणसभाय् न्ववाःपिं व्यवसायीतय्सं ‘फोहर पाखें मोहर’ दयेकीगु कपाय् उद्योगयात सरकारं उद्योगमैत्री वातावरण बीमफुगुलिं थ्व व्यवसायय् हे धरापय् लानाच्वंगु खँ धाःगु खः ।

स्वगू तहया सरकारं थीथी कर काइगु व दर्ता मयासें घुम्ती सेवा बीगु उद्योग लाक्वपाक्व रुपं संचालन जुयाच्वंगुलिं दर्ता यानाः संचालनय् वयाच्वंगु उद्योगत संकटय् लाःगु खँ नेपाल कपास व्यवसायी संघया केन्द्रीय अध्यक्ष चन्दना कोइराला धयादिल । तःधंगु ल्याखय् रोजगारी बीगु कपाय् उद्योगयात आयात निर्यातय् सरकारं पनातःगु व लाक्वपाक्व घुम्ती सेवा बीपिं अवैध व्यवसायीतय्त कारवाही मयागुलिं तःधंगु ल्याखं थ्व पेशाय् लगय् जुयाच्वंपिं पलायन जुयाच्वंगु खँ वय्कलं धयादीगु खः ।

‘कानुनं उद्योगया पांग्रा दइमखु, थ्व छथाय् हे दयाच्वनेमाः धयातःसां ट्र्याक्टरं कपाय् पेले याइपिं दर्ता मयासे, अनुमति तकं मकासे गांगामय् वनाः संचालन यानाच्वंगुलिं सरकारयात राजश्व नं ठगी जुयाच्वंगु दुसा वैधानिक रुपं संचालन जुयाच्वंपिं मेमेपिं व्यवसायीत नं मारय् लानाच्वंगु दु’ वय्कलं धयादिल ।

तःधंगु ल्याखय् रोजगारी बीगु कपाय् उद्योगयात आयात निर्यातय् सरकारं पनातःगु व लाक्वपाक्व घुम्ती सेवा बीपिं अवैध व्यवसायीतय्त कारवाही मयागुलिं तःधंगु ल्याखं थ्व पेशाय् लगय् जुयाच्वंपिं पलायन जुयाच्वंगु दु

वय्कःया कथं देय्न्यंकं २ हजार २०० म्ह कपाय् व्यवसायी दु । अथेहे देय्न्यंकं पुलांगु कापः पेले यानाः थीथी प्रयोजनय् वइगु कपाय् दयेकाच्वंपिं पेशाकर्मीतय् कारणं देय्न्यंकं प्यंगू लाख ५० हजारयात प्रत्यक्ष रोजगारी चूलानाच्वंगु दुसा ३० हजार स्वयां अप्वः कपाय् सम्बन्धी व्यवसाय् संचालनय् वयाच्वंगु दु ।

संघया केन्द्रीय महासचिव श्याम पौडेलं पुलांग्ु कापः पेले यानाः सिरक, डसना दयेकूगु व्यवसाययात हेलया दृष्टिं स्वइगुलिं थःपिनि पेशाया हे धरापय् लानाच्वंगु बिचाः प्वंकादिल । वय्कलं दर्ता मयासें औद्योगिक नीति विपरीत गांगामय् ट्र्याक्टर ज्वना वनाः कपाय् पेले यायेगु ज्या गण्डकी प्रदेशं रोके याःपिं मेथाय् खुला हे जुयाच्वंगु खँ धयादिल ।

वय्कलं धयादिल, ‘भारतं थःपिनि कपाय् उत्पादनयात च्वन्ह्याकेगु निंतिं कच्चा पदार्थया रुपय् थीथी देशं हजारौं टन पुलांग लं हयेगु यानाच्वंगु दु, तर नेपालय् दुगु उत्पादन गुणस्तरीय जूसां नं सरकारं काइगु थीथी कर व कानुनी झण्झटं व्यवसायी विस्थापित जुया वनीगु अवस्थाय् लाःगु दु ।

ज्याझ्वलय् ख्वप जिल्ला समन्वय समितिया सभापति नवराज गेलालं चिधंगु उद्योगया संरक्षणया नीति हयाः करया क्षेत्रय् तब्याकाः सानाी व्यवसायीतय्त प्रोत्साहन बीमाःगु खँ न्ह्यथनादिल ।संघया सचिव रामशरण दाहालं सरकारं बिया वयाच्वंगु २५ केभिए तकया ऊर्जा खपतयात वृद्धि यानाः म्होतिं नं ५० केभिएतकया विद्युतीय ऊर्जा उपलब्ध याकाः उद्योगयात गतिशिलता अप्वयेकेत सरकारयाके माग यानादिल ।

ख्वप उद्योग वाणिज्य संघया वरिष्ठ उपाध्यक्ष प्रदीप श्रेष्ठ, गैसस भक्तपुरया अध्यक्ष सोम शर्मा व नेपाल पत्रकार महासंघया अध्यक्ष पुष्करराज बुढाथोकी लिसें साना उद्योग प्रवद्र्धनय् बः बियादिल ।

सम्बन्धित बुखँ

LEAVE YOUR COMMENTS