मेसीयात स्वलाया प्रतिबन्ध

फुटबलया सुपरस्टार अर्जेन्टिनी कासामि लियोनल मेस्सीयात स्वला तक अन्तर्राष्ट्रिय फुटबल म्हिते मदइकथं प्रतिबन्ध तःगु दु । अर्जेन्टिनी राष्ट्रिय टिमया कप्तान मेसीं छुं ई न्ह्यव क्वचाःगु कोपा अमेरिका फुटबल प्रतियोगिता भ्रष्ट जूगु टिप्पणी याःगुलिं थ्व प्रतिबन्ध तःगु खः ।

अर्जेन्टिना व चिली दथुइ स्वंगूगु थाय्या निंतिं जूगु प्रतिस्पर्धाया झ्वलय् ह्याउँगु कार्ड नयाः मैदानं पिहां वनेमाःगु खः । मेसीं उबलय् थ्व धेंधेंबल्लाया उपाधी न्हापाया हे ब्राजिलया निंतिं सुरक्षित यानातयेधुंकूगु टिप्पणी याःगु खः । लिसें वं स्वंगूगु थासय् लाःगु मेडल कायेत नं अस्वीकार याःगु खः ।

कोपा अमेरिकाया सेमिफाइनलय् ब्राजिलपाखें २–० गोलया अन्तरं बुइवं अर्जेन्टिनी फुटबल संघं नं थुगु कासाय् रेफ्री गम्भीर गल्ती याःगु खँ धाःगु खः । दक्षिण अमेरिकी फुटबल संघं धाःसा थःपिंत लाःगु द्वपं निराधार जूगु खँ धाःगु खः ।मेसीया दक्षिण अमेरिकी फुटबल संघं प्रतिबन्ध लिसें ५० हजार अमेरिकी डलर जरिवाना नं याःगु खः ।

मेसीयात थ्व निर्णयविरुद्ध अपील यायेत छवाःया ई बियातःगु दु । प्रतिबन्ध कायम हे जुल धाःसा मेसीं वइगु सेप्टेम्बर व अक्टोवरय् चिली, मेक्सिको व जर्मनी लिसे जुइगु मैत्रीपूर्ण कासाय् म्हितेखनी मखु । अर्जेन्टिनां सन् २०२२ या विश्वकप फुटबलया छनोटया निंतिं सन् २०२० या मार्च निसें म्हितेगु सुरु यायेत्यंगु दु ।

सम्बन्धित बुखँ

LEAVE YOUR COMMENTS