सरकार मेलम्ची गबलय् वइ ?

नेपाल कम्युनिष्ट पार्टी (नेकपा)या दुइतिहाइ बहुमतया सरकारया नेतृत्व यानाच्वंम्ह प्रधानमन्त्री ओलीयात लःया स्वयां नं लःजहाजया अप्वः चिन्ता । लः जहाजय् च्वनेत टिकट काटे याःसां जिल धाःगु हे दछि दइन ! लःजहाज ला छु, भ्वंया जहाज तक नं खने मदुनि । अथे हे खानेपानी मन्त्री विना मगरं मेलम्चीया लः २०७५ सालया मोहनिया इलय् वइ धकाः धाःगु खः ।

आः २०७६ सालया मोहनि वइन, अय्नं मेलम्चीया अत्तोपत्तो मदुनि, अले मेलम्ची आयोजनतकं लथालिंग जुयाच्वन । थुकथं हे येँ महानगरपालिकाया मेयर विद्यासुन्दर शाक्यं नं स्थानीय तहया निर्वाचनया इलय् थः येँ मनपाया मेयरय् त्यात धाःसा मेयर जूगु निदँया दुने येँ महानगरय् मोनोरेल ब्वके धकाः धयादीगु खः ।

विद्यासुन्दर शाक्य मेयर जूगु नं निदँ दयेधुंकल ग्व मोनोरेल येँ ब्वाँय् वंगु ?लः जहाज चले यायेगु, मोनोरेल चले यायेगु, आइफा अवार्ड ज्याझ्वः ग्वसाः ग्वयाः न्ह्यइपुकेगु नेतातय् महत्वकांक्षी म्हगस जुइफु, तर लःजहाज, मोनोरेल, प्यंगू अर्बया धरहरा थनया नागरिकतय् आःया आवश्यकता धाःसा पक्का नं मखु ।

लःजहाज, मोनोरेल, धरहरा मदु धकाः थनया नागरिकतय्त छुं नं नकारात्मक लिच्वः लाइमखु । नागरिकतय्त छुं हे समस्या ब्वलंकीमखु । तर लः मंत धाःसा थुकिं नागरिकतय्त तःधंगु हे समस्या जुइ । लः धइगु मनूतय् जीवननाप स्वापू दुगु खँ खः । लः मदयेक सुं नं प्राणी म्वाये फइमखु धइगु खँ ला झी प्रधानमन्त्री व खानेपानी मन्त्रीं मथूगु ला पक्का नं खइमखु जुइ ! सीक चायेकं वा थुइकाः नं बुझ पचे यानाच्वंगु जक खः ।

खतुं मुक्कं खानेपानी मन्त्रालय हे भ्रष्टाचारय् लिप्त धकाः नं धाइ । मेलम्ची आयोजनाय् नं कमिसनया चलखेलं यानाः आयोजना पूमवंगु धइगु खँ दु । थज्याःगु खँय् प्रधानमन्त्रीया ध्यान वनाच्वंगु खनेमदु । खय्तला प्रधानमन्त्रीनिसें कयाः नेता अले अभिनेतातय् तकं ध्यान लःजहाज, रेल, मोनोरेल, धरहरा, अन्तर्राष्ट्रिय क्रिकेट मैदान निर्माण यायेगुलिइ जक वनाच्वंगु दु धाःसां जिउ ।

स्वनिगलय् लःया तःधंगु हे समस्या दु । तर झी प्रधानमन्त्री धाःसा ‘मेरो धरहरा म आपैm बनाउँछु’ धकाः लगे जुयाच्वन । मेलम्चीया लः याकनं हजि धकाः न खानेपानी मन्त्रीयात निर्देशन बी फु, न त ज्या याये मफुम्ह मन्त्रीयात हे चिइके फु । अथेला मेलम्ची आयोजनाय् राजनीतिक व आर्थिक रुपं चलखेल जुयाच्वन धइगु नं चर्चा जुयाच्वंगु दु ।

मेलम्ची आयोजनाया ठेकेदारयाके कमिसन फ्वंगुलिं यानाः आयोजनाया ल्यं दुगु ज्या हे त्वःताः वन धइगु नं यक्व हे चर्चा जुयाच्वंगु दु ।
देशय् लःया चरम समस्या दु । नेपाःमितय्त त्वनेत लः मदु, तर झी बुद्धिमान खानेपानी मन्त्री धाःसा नेपाःया लः विदेशय् मीगु धकाः धक्कु त्वःताच्वंगु दु । येँ देशय् वा स्वनिगलय् जक मखु, नेपाः देशय् हे लःया चरम अभाव दु ।

लःया समस्या समाधान याये मफुत धाःसा भारतया चेन्नइ सहरय् थें लःया समस्यां यानाः रेल, होटल तकं बन्द यायेमाःगु अवस्था वःथें नेपालय् नं अज्याःगु हे अवस्था मवइ धकाः धाये मफु । मेलम्चीया लः येँय् वल धाःसा छुं भचा जूसां लःया अभावया समस्या समाधान जुइ । तर थुकी सरोकारवालातय् ध्यान छफुति हे नं वनाच्वंगु मदु ।

‘साया घाः क्वखं मसिउ’ धाःथें आम नागरिकयात जुयाच्वंगु समस्या झी प्रधानमन्त्री व खानेपानी मन्त्रीं नं मसिउ धाःथें जुयाच्वन । झी प्रधानमन्त्रीं ससःखलःया कला, संस्कृति, भाषा, रीतिरिवाज, सम्पदा, नखःचखः अले गुथि प्रथायात नं मसिउ थें यानाच्वन । ब्रम्हु जिलाजं नं नेवाःया म्ह्याय्मचा जक यंकूगु मखु, गुथि, नखःचखः नापं चट् यायेत स्वयाच्वंगु दु ।

प्रधानमन्त्री, मन्त्री, सांसद, नेतातय्त ट्यांकरं लः माक्व थ्यनाच्वंगु दुसा अले थुमिसं गथे यानाः आम नागरिकया समस्या छाय् समाधान यायेत स्वइ । स्वनिगःया आम नागरिकया निंतिं लःया आपूर्ति यायेगु जिम्मा कयाच्वंम्ह काठमाडौं उपत्यका खानेपानी लिमिटेडं ग्राहकतय् छेँय्छेँय् लः छ्वया हयेत लः मदु ।

प्रधानमन्त्री, मन्त्री, नेतातय्थाय् छ्वयेत धाःसा गाक्कं दु । थिकेक ध्यबा कयाः लःया व्यापार यानाच्वंगु दु । खानेपानी कम्पनीतय्सं थिकेक ध्यबा कयाः ट्यांकर का ट्यांकर लःया व्यापार यायेगु धइगु सरासर बेइमानी खः । खानेपानी लिमिटेडं लः बी मफुसां निजी ट्यांकर व्यवसायीतय्सं धाःसा माक्वं लः बिया वयाच्वंगु दु, मिया वयाच्वंगु दु ।

ट्यांकरया लः, जारया लः, मिनरल वाटर माःसा बजारय् माक्वं न्यायेगु दु । निजी कम्पनी व ट्यांकरतय्सं माक्वं लः बी फुसा काठमाडौं उपत्यका खानेपानी लिमिटेडं जक छाय् थः गाहाकितय्त लः बी मफुत ? न्ह्यसः ला थन थाय् दु । लःया थज्याःगु समस्या जुयाच्वनं नं खानेपानी मन्त्रीं मेलम्ची हयेगु छाय् कुतः मयात ले ?

गनं खानेपानी मन्त्रीज्यू निजी लःया कम्पनी व ट्यांकरतय् कमिसनया चक्करय् जकं लानाच्वंगु मदुला ? धाइ मेलम्चीया लः येँय् थ्यन धाःसा गनं लःया व्यापार यानाच्वंपिं निजी कम्पनी व ट्यांकरं लःया व्यवसाय यानाच्वंपिंत लिच्वः लाइगु जूगुलिं जक मेलम्चीया लः हयेगुलिइ ध्यान मबिसे च्वनाच्वंगु जकं मखुला ?

मेलम्चीया लः येँय् थ्यन धाःसा येँय् लःया समस्या छुं भचासां समाधान जुइ धकाः आशा यानाच्वंपिं स्वनिगःवासीत मेलम्चीया लः हे त्वने मखंकं परमधाम जकं जुइगु मखुला धकाः नं चिउताः कायेगु याना हयाच्वंगु दु । गनं मेलम्चीया लः स्वनिगलय् हयेगु निंतिं स्वनिगःवासीतय्सं मेगु आन्दोलन जकं याये मालीगु खः ला कि ?

सम्बन्धित बुखँ

LEAVE YOUR COMMENTS