विश्वकप छनोटय् नेपाःया न्हापांगु कासा जिम्बावेलिसे

येँ– विश्वकप छनोटय् नेपालं न्हापांगु कासा जिम्बावेलिसे म्हितीगु जूगु दु । अन्तर्राष्ट्रिय क्रिकेट महासंघं थौं पितबिउगु तालिका कथं नेपालं न्हापांगु कासा मार्च ४ तारिखय् म्हिती । नकतिनि क्वचाःगु आइसिसी विश्व क्रिकेट लिग डिभिजन २ या उपविजेता जुयाः नेपाः विश्वकप छनोट चरणय् थ्यंगु खः ।

जिम्बावेय् हे वइगु फागुन २० निसें जुइगु कासाय् नेपाः समूह ‘बी’ इ लाःगु दु । थ्व समूहय् अफगानिस्तान, हंगकग, जिम्बावे व स्कटल्यान्ड दुथ्यानाच्वंगु दु । टाइसिट कथं नेपालं मार्च ८ गते स्कटल्यान्डलिसे, मार्च १० य् अफगानिस्तानलिसे व मार्च १२ हंगकंगलिसे म्हिती ।

समूह चरणय् फुक्कं टिमं थःथवय् छगू छगू कासा म्हितीसा उत्कृष्ट स्वंगू स्वंगू टिम सुपर सिक्सय् वनी । छनोट कासाया समूह ‘क’य् वेस्ट इन्डिज, आयरल्यान्ड, पपुवा न्युगिनी व नेदरल्यान्ड लानाच्वंगु दु ।

सुपर सिक्सय् छगू टिमं स्वंगू कासा म्हिती । समूह चरणय् वःगु ल्याः नं सुपरसिक्सय् दुथ्याकी । छनोटय् दुथ्याःगु खुगू एसोसियट टिम मध्ये नेदरल्यान्डसहित प्यंगू टिमयात प्यदँया निंतिं एकदिवसीय अन्तर्राष्ट्रिय मान्यता चूलाइसा छनोटया विजेता व उपविजेता सन् २०१९ य् इंग्ल्यान्डय् जुइगु एकदिवसीय विश्वकपय् म्हितेखनी ।