ने. सं. ११४४ चौलाथ्व अष्टमी -

विप्लव : आतंककारी वा क्रान्तिकारी ?

छुं ई न्ह्यः सरकारं विप्लव माओवादीयात प्रतिबन्ध तयाः वयागु गतिविधियात सरकारं तसकं निगरानी तःगु खः । सत्ताय् हे दुगु नेपाल कम्युनिष्ट पार्टी (नेकपा) पाखें अलग्ग जुयाः क्रान्तिकारी धार दयेकूम्ह छगू शक्तिशाली पार्टी खः नेपाल कम्युनिष्ट पार्टी माओवादी वा नेक्रबिक्रम चन्द विप्लवया माओवादी पार्टी ।

तर सरकारय् थःपिं वनेवं धाःसा उगु पार्टीयात छगू ल्याखं मिखाय् वंगु धू थें हे स्वयेगु याना हल । छगू इलय् थःपिंनाप हे राजनीतिक गतिविधि व क्रान्तिकारी गतिविधि वा मारकाटया ज्याय् दुथ्याःम्ह खः ल्याय्म्ह नेता नेक्रबिक्रम चन्द ‘विप्लव’ । आः विप्लव प्रति सरकार कठोर जूवंगु दु ।

सरकारं जनताया फुक्कं इच्छा पूवंगु व आः क्रान्तिया जरुरी मन्त धइगु खँ कनेगु यानाच्वंगु दु । थ्व इलय् सकलें जनतां नये खन, पुने खन अथे जुयाः आन्दोलनया औचित्य मंत धइगु धारणा सरकारं तयाच्वंगु दु । थन आः समस्या छुं मंत धयाच्वंगु दु । आः नकतिनि हे जक सरकारया प्रवक्ता व सूचना तथा सञ्चार मन्त्री गोकुल बास्कोटां सञ्चार मन्त्रालयय् पत्रकार सम्मेलन यासें सरकार विप्लव माओवादी प्रति कठोर जूगु संकेत बिउगु दु ।

बास्टोला थःम्हेसिनं हे उगु पुचः पार्टी मजूगु, राजनीतिक सोच विचार नं मदुगु व मानवविहिन थासय् वनाः आतंक जक न्यंकीगु शक्ति जूगु व मेहिनत मयासे नइगु आतंककारी समूह जूगु खँ धाःगु दु । यदि विप्लव आतंक जक न्यंकीगु शक्ति खत धाःसा उगु हे समूहय् च्वनाः हाल गृहमन्त्री तकं जूम्ह रामबहादुर थापा बादलया उगु ईया गतिविधियात छु धायेगु ?

उपिं नं सुरु सुरुं ला जंगलय् हे च्वनाः विदेशय् च्वनाः वा मनूत मवइगु अलग्ग संसारय् हे च्वनाः सरकार समक्ष थःपिनि माग न्ह्यब्वयाच्वंपिं खः । उगु इलय् उपिं नं थुकथं हे थ्व पूँजीवादी सरकारया नाइकेपिं शेरबहादुर देउवा, माधव नेपाल व झलनाथ खनालपिंसं आतंककारी, अराजकतावादी वा स्वार्थी चन्दा आतंक न्यंकीगु समूह धकाः संज्ञा बिउगु खः ।

आः उपिं सत्ताय् दु व थःपिंसं न्हापा याः थें क्रान्तिया लागिं वातावरण तयार यानाच्वंगु शक्तियात आतंककारी, अराजकतावादी व ध्यबा जक असुल याइगु पुचः धयाच्वंगु दु । युद्धया लागिं व परिवर्तनया लागिं बन्दूक ज्वनीबलय् आतंकवादी जुइगु, क्रान्तिकारी धार त्वःताः पूँजीवादी सत्ताय् प्यपुनीगु इलय् प्रगतिशील व सच्चा कम्युनिष्ट जुइगु खँ कदापि मिले जूगु खँ मखु ।

सुरुं माओवादी जन्म जूगु इलय् नं रोल्पा व रुकुमया जंगलय् छगू निगू चौकी ध्वस्त यानाः सुरु जूगु खः । लिपा उगु युद्धं तःधंगु रुप काल । अर्थात् सरकारया नीति गलत जूगु कारणं नं माओवादी जनयुद्धय् झिंन्याद्वः मनुखं ज्यान वंका च्वनेमाल ।

कि त थःपिं नं अथे हे अराजकतावादी शक्ति, आतंककारी शक्ति व गैर जिम्मेवारी वा न पार्टी न माक्र्सवादी खः धइगु खँ स्वीकार याये फयेके माल, मखु धइगु खःसा विप्लव नं थःपिं माओवादी पार्टीइ लगे जूगु ल्याखं नं आः वयाः उगु द्वपं बीगु कच्चा बुद्धि खः । राजनीतिक शक्तियात राजनीतिक शक्ति कथं स्वीकार याये मफुतले देसय् शान्ति सुरक्षा र अमनचयन कायम जुइ मखु ।

सरकार छखे व माओवादी पार्टी मेखे जुइगु संकेत खने दयावःगु दु । थथे जुइगु इलय् नेपाली जनतां चाहे जू थें शान्ति व समृद्धिया नारा गबले पूवनीगु खः व धाःसा स्वये ल्यं हे दनि । विप्लव पुचःयात माक्र्सवाद जक मखु कि विश्वया गुगुं नं वाद, सिद्धान्त व विचारया लिधंसाय् न्ह्यानाच्वंगु पुचः मखु धइगु द्वपं बिउगु दु ।

उगु खँ खःसा छाय् प्रतिबन्ध लगे यायेगु खँ तकं न्ह्यथनाः छाय् हाकनं चन्द नाप वार्ता जुइफइगु संकेत क्यन । अथे जुयाः युद्ध जारी जुइबलय् सन्धी सम्झौताया मस्यौदा तयार जुयाच्वनीगु व युद्धविराम यायेगु खँ ल्हाइगु इलय् धाःसा छुं नं छुं थासय् आक्रमणया लागिं बन्दूक तयार जुयाच्वनीगु खँ सत्य सावित जूगु दु ।

थ्व इलय् विप्लव समूहयात समूल नष्ट यायेगु हे ल्याखं सरकार न्ह्यःने वःगु क्यनाः दुनं दुनं वार्ता यानाः मिले यायेत्यंगु दु । सरकारं वार्ता यायेत सःतल नं वार्ता यायेत न्ह्यमचिउगु कारण थ्व पुचः आः शक्तिशाली जुइधुंकल धइगु सीदु । शत्रुयात कमजोर तायेकेगु वा छम्ह निम्ह मनू पूँजीवादी सत्ताय् वनाः मन्त्री जुइगु स्वयां विप्लव राज्यसत्ता हे थःपिनि ल्हातय् लाकेत स्वयाच्वंगु दु धइगु खनेदु ।

सुरुं माओवादी जन्म जूगु इलय् नं रोल्पा व रुकुमया जंगलय् छगू निगू चौकी ध्वस्त यानाः सुरु जूगु खः । लिपा उगु युद्धं तःधंगु रुप काल । अर्थात् सरकारया नीति गलत जूगु कारणं नं माओवादी जनयुद्धय् झिंन्याद्वः मनुखं ज्यान वंका च्वनेमाल । आखिर पूँजीवादी सत्ताय् हे थःपिनि हिस्सा माग यासें आः माओवादी सत्ताय् थ्यनाच्वंगु दु ।

सरकारं हाल विप्लव समूहयात सामाजिक फाँसीवादी समूहया रुपय् संज्ञा बियाच्वंगु दु । अथे जुयाः सरकारं वार्ताया कुतः याःसां वार्ताय् मवःगु खँ पत्रकार सम्मेलनय् स्पष्ट याःगु दु । थुकिं यानाः छगू इलय् नापं जुइपिं थ्व नेतात आः विपरित धु्रबय् थ्यंगु लिउने थ्व शक्तित मध्ये गुगु पुचलं लँ द्वंकूगु खः धइगु नं सीकेमाः ।

छखे माओवादीं म्हिगः क्रान्ति यानागु धासें युद्धया माध्यमं परिवर्तन हयेगु सोच यानाः जनतायात बन्दूक ज्वंकूगु खः । थौं नं विप्लव पुचलं उगु हे खँयात जक निरन्तरता बिउगु खः । आः पूँजीवादी सत्ताय् वनाः सत्ताया सवाः कायेधुंकूगु थुगु शक्ति नेकपायात लँ द्वंकूगु शक्ति धायेगु वा निरन्तर क्रान्ति व परिवर्तनया लागिं ल्वानाच्वंपिं द्वंकूपिं धायेगु ?

तप्यंगु पतिंचां घ्यः मवल धाःसा पतिंचा बेक्वयेकेत बाध्य जुइ । छगू इलय् शेरबहादुर देउवाया सरकारयात ४० बँुदे माग न्ह्यब्वयाः उगु खँय् छुं सुनुवाई मजुल धकाः लिपा युद्ध यानाः उकिं सम्झौता मार्फत् थःपिं नं सत्ताय् हे थ्यंकूगु शक्तिं आः वयाः विप्लवया माग व चाहनायात सरकारय् थ्यंकाः अस्वीकार यायेगु धइगु कन्हय् विप्लव नं उगु हे थासय् थ्यंकेगु निंतिं थःपिंसं भूमिका म्हितेगु थें मजुइला ?

थौंया मिपुसां कन्हय् मिप्वाः जुयाः दनदन मच्याइ गथे धायेगु ? विप्लवया माग सरकारं बेवास्ता यात धाःसा जुइगु आखिर थथे हे खः । मेहनत मयासे नयाच्वंगु धयातःगु शक्तिं यदि थःपिंत उकथंया हे मलजल चूलावन धाःसा तःधंगु शक्ति जुयाः देश न्ह्यःने यंकेफु । अथे जुयाः नं शत्रुयात कमजोर तायेकेगु ज्या गबलें याये मजिउ । विप्लव आतंककारी शक्ति खः वा क्रान्तिकारी शक्ति खः धइगु खँ झीसं वाःचायेकेमाः ।