येँ – सरकारं स्मार्ट सवारी चालक अनुमति छापे यायेत ‘मास प्रिन्टर व कार्ड’ न्यायेगु प्रक्रिया न्ह्याकूगु दु । स्मार्ट सवारी चालक अनुमति पत्र छापे यायेगु ज्याय् जुयाच्वंगु ढिलासुस्तीयात चिइका छ्वयेत मास प्रिन्टर व कार्ड न्यायेगु प्रक्रिया न्ह्याकूगु खः । लिपांगु इलय् स्मार्ट सवारी चालक अनुमति पत्र छापे यायेगु ज्याय् ढिलासुस्ती जुयाच्वंगु व छापे जूसां नं उकी थीथी विवरण स्पष्ट मजूगु धासें सेवाग्राहीतय्सं गुनासो यायेगु क्रम अप्वयाच्वंगु दु ।
यातायात व्यवस्था विभागं सेवाग्राहीयात सहज व फक्व याकनं सेवा बीगु ल्याखं मास प्रिन्टर व कार्ड न्यायेगु प्रक्रियायात न्ह्याकूगु खः ।
थ्व स्वयां न्ह्यः विभागं करिब लछि न्ह्यः जक ग्लोबल टेन्डरपाखें १० गू लाख कार्ड छापे यायेगु प्रक्रिया न्ह्याकूगु खः । झिगू लाखमध्ये न्हापां प्यंगू लाख व लिपा खुगू लाख हयेगुकथं सम्झौता यानागु विभागया प्रवक्ता तीर्थराज खनालं जानकारी बियादीगु दु ।
आवेदन बियाः नं स्मार्ट चालक अनुमतिपत्र काये मखंनिपिं करिब गुंगू लाख सेवाग्राहीयात चालक अनुमतिपत्र उपलब्ध याकेगु ल्याखं मास प्रिन्टर व कार्ड न्यायेगु सम्बन्धय् ठेक्का सम्झौता तकं जुइगु विभागं न्ह्यथंगु दु ।
थौंकन्हय् विभागयाके ७० हजार जक कार्ड ल्यं दुगु व कार्डया म्होतिं यानाः मागकथं स्वयां नं आवश्यकतायात ध्यानय् तयाः कार्ड छापे यानाच्वनागु वय्कलं कनादिल । विभागं आः माग याःगु १० गू लाख कार्ड नं छापे जुयाः वयेत म्होतिं नं दछिया ई काइगु अनुमान नं वय्कलं यानादिल ।
LEAVE YOUR COMMENTS