रेलया फ्रि टिकटया निंतिं ……..

नेपालय् रेल हयेगु चर्चा जुयाच्वंगु यक्व दयेधुंकल । थ्व चर्चा आतक नं दिउगु मदुनि । तर विकसित देय्या सहरय सार्वजनिक यातायात दकलय् प्रचलित माध्यम धइगु हे मेट्रो रेल खः । विकसित देशय् चले जुइगु रेल सार्वजनिक यातायातय् जक सीमित मजू । थुकी अनेकथंया सुविधात नं दु ।

थज्याःगु हे थीथीकथंया सुविधाया झ्वलय् रुसया राजधानी मस्कोया मेट्रो रेलया तसकं चर्चा जुयाच्वंगु दुसा थनया रेलया विषययात कयाः सामाजिक संजालय् भाइरल नं उतिकं जुयाच्वंगु दु । मस्को सहरया रेल चर्चाय् वःगु कारण खः वं हःगु छगू अजू चायापुगु ‘अफर’ । अले थ्व अफर खः सितिकं यात्रा यायेगु टिकट कायेगु ।

उकिया निंतिं छगू शर्त पूवंकेमाः । अले व खः उठबस यायेगु । व नं यक्व यायेम्वाः । मात्र ३० क्वः उठबस याःसा गाः । थुलि उठबस यात धाःसा मेट्रो रेलं ‘फ्रि टिकट’ उपलब्ध याकी । तर थुकी दुने नं छगू नियम दु । व छु धाःसा मुक्कं २ मिनेट दुने ३० क्वः उठबस यायेफुम्हेसित जक मेट्रो रेलया फ्रि टिकट अले रेलय् यात्रा यायेखनी ।

मेट्रो रेलं हःगु थुकथंया योजना रेलय् यात्रा याइपिं यात्रु अप्वयेकेत धाःसा मखु, व विशेष यानाः जनतातय्सं थःगु स्वास्थ्यप्रति सजग व सचेत जुइमा धइगु ल्याखं थुकथंया योजना हःगु खः । थौंकन्हय् मस्कोया मेट्रो रेल स्टेशनय् सितिकं टिकट कायेगु निंतिं मनूत उठबस यानाच्वंगु भिडियो सामाजिक संजालय् भाइरल जुयाच्वंगु दु । उलिजक गन खः धकाः मनूत उठबस यायेत हे झ्वःछुना च्वंगु दु ।

सम्बन्धित बुखँ

LEAVE YOUR COMMENTS