माननीय रेशम चौधरीया रिहाई

न्ह्यखँ ः
आपाः नेतातय्सं वा झी दथुया पासापिंसं हे मसिउ जुइ, माननीय रेशम चौधरीया तिरिमय्जु नेवाःनी खः । श्रेष्ठ परिवारया मय्जु रंजिता श्रेष्ठ व
रेशमया छम्ह झिंनिदँ दुम्ह काय् नं दु ।

अदालतं टिकापुर घटनाया योजनाकार मध्ये छम्ह खः धकाः चौधरीयात दिल्लीबजार कारागारय् तयातःगु दु । अय् जूगुलिं वय्कलं काये दइगु तलब तकं मदयाः आः छेँ जःपिंत आर्थिक समस्या जुयाच्वंगु दु । हाल माननीय चौधरीया सकल छेँजःपिं येँय् हे न्यायया निंतिं इनाप याः वयाच्वंगु दु ।

टिकापुर घटना ः
सुदुर पश्चिमया टिकापुरय् संसदीय चुनाव जुइ न्ह्यः थारुतय् आन्दोलन जुयाच्वंगु इलय् आन्दोलन उत्कर्षय् थ्यंकाः न्हय्म्ह पुलिस (छम्ह एसएसपी लगायत) स्याना बिउगु खः । घटना लिपा २६ म्ह थारुतय्त ज्वनाः धनगढीया कारागारय् निब्व थलाः कुनातःगु खः । थुकी युवा थारु नेता लक्ष्मण थारु नं ज्वंगु खः ।

तर माननीय रेशम चौधरी फरार जुयाच्वंगु अवस्थाय् संसदीय चुनावय् ब्वति कयाः ३४,५०० मत हयाः चर्चित कथं त्याःगु खः । छुं ई न्ह्यः धनगढीया अदालतं लक्ष्मण थारुयात स्वदँया निंतिं जेलय् तयेगु निर्णय जूगु खः, तर वय्कः स्वदँ तक जेलय् च्वने धुंकूगुलिं वय्कः जेल मुक्त जुल । तर रेशम चौधरीयात धाःसा झिदँ तक जेलय् तयेगु निर्णय कथं आः जेलय् लानाच्वंगु दनि ।

निम्ह थारु मस्त नं जेलय् ः
२६ म्ह जेलय् लाःपिं आरोपीत मध्ये निम्ह झिंप्यदँयापिं मस्त खः । उमित पोखराया बाल सुधार केन्द्रय् तयातःगु खः । थुपिं निम्ह मध्ये छम्ह जेल मुक्त जूसां मेम्हं धाःसा एसएसपीयात कथिं दायाः स्यानागु हे खः धकाः आरोप स्वीकार याःगु खः ।

उम्ह मचां आन्दोलन जूगु इलय् लाठी व टियर ग्याँस कयेकुसां न्हापां सह यानागु खः । तर गोलीं कयेका हयाः जिगु तुतिइ लाःगुलिं सह याये मफयाः आट्याक यानागु खः धकाः बयान बिउगु खः । व हे थारु मचायात झिदँ जेलय् कुनेगु आदेश अदालतं बिउगु दु ।

सांसद रेशम चौधरी ः
माननीय रेशम चौधरी चुनावया लिच्वः कथं धनगढीया ९० प्रतिशत स्वयां अप्वः मत हयाः चुनाव त्याकूम्ह सांसद खः । खः, छगू सुदुरपश्चिमया थारुत छप्पँ छधी जूगुया दसु खः । वय्कः फरार करार यानातःम्ह व्यक्ति जूगुलिं चुनाव त्याःगु दसिपौ तकं काये मखनाच्वंम्ह सांसद खः । तर लिपा थः हे अदालतय् हाजिर जुयाः गिरफ्तारी बिल ।

टिकापुरया घटना लिपा थारु समुदायया मनोबल उच्च जुल । अले उमिगु हे
माग कथं निर्वाचन आयोगया धलखय् बिस्कं थारुतय्गु क्लस्टर तये दत । वहे कथं थारुतय् ल्याः संसदय् आपाः प्रतिनिधित्व याये खन ।

अनंलि जेल चलान यानाः डिल्लीबजारया कारागारय् तयातःगु दु । लिपा छुं ई वय्कः बिरामी जूबलय् बीर अस्पतालय् भर्ना जुल । उसाँय् भचा बांलाये धुंकाः हाकनं जेलय् हे चलान याना छ्वत । लिपा हानं जन दबाबया कारणं पार्टीया इनाप कथं वय्कःयात संसदय् हे सःताः शपथ ग्रहण याकेगु ज्या जुल । सांसदया लोगो नं लःल्हात ।

तर थ्व घटना लिपा सरकारं जेल मुक्त यायेगु पहल काइ ला धकाः विचाः याःगु खः, तर हानं जेलय् हे तयाबिल । मेखे धाःसा प्रदेशया सांसद दिपक मनांगेयात शपथ ग्रहण जक मखु, जेलं मुक्त नं याना बिल । गुगु सरकारया बांलाःगु ज्या मखु । माननीय चौधरीयात नं त्वःतके माःगु खः ।

थारुतय् संवैधानिक उपलब्धी ः
छगू खँ छु धायेबलय् सी दयेक हे टिकापुरया घटना लिपा थारु समुदायया मनोबल उच्च जुल । अले उमिगु हे माग कथं निर्वाचन आयोगया धलखय् बिस्कं थारुतय्गु क्लस्टर तये दत । वहे कथं थारुतय् ल्याः संसदय् आपाः प्रतिनिधित्व याये खन । खय्त ला थुकिया फाइदा रेशम चौधरी थेंज्याःपिं छम्ह निम्ह बाहेक मेमेगु पार्टीया सदस्यतय्सं जक काये खन ।

तर न्ह्याथे जूसां थारुतय्गु ल्याः संसदय् नेवाः, तामाङ, लिम्बु, खम्बुतय्गु स्वयां आपाः खने दत। थ्व चाःचू उपलब्धी मखु । तर दुई तिहाइया दम्भ बियाच्वंगु ओली सरकारं ९० प्रतिशत स्वयां आपाः जनताया म्याण्डेड कयाः त्याकावःम्ह रेशम चौधरीयात जेलय् कुनातःगु जनमतयात कदर मयाःगु खः ।

पहिचानया निंतिं जुयाच्वंगु धर्ना ः
पहिचानय् आधारित संघीय गठबन्धनपाखें बानेश्वरय् याःगु धर्ना व जुलुस ज्याझ्वलय् रेशम चौधरीया तिरिमय्जुं सशक्त भाषण बियाः सकसितं अजू चायेकादिल । वय्कः नेतृत्व क्षमता दुम्ह नेवाः मिसा साबित जुयादिल । वय्कलं थः भाःतया रिहाईया निंतिं सः तयेत सकल नेवाःतय्त इनाप नं यानादिल ।

तर विडम्बना, नेपाः राष्ट्रिय पार्टी समेत दुथ्याःगु थ्व गठबन्धनया ज्याझ्वलय् नेवाः अभियन्तातय् ल्याः द हे मदुगु स्थिति दु । खय्त ला थुकिं नेवाः राजनीतिक अभियान व नेवाः सांस्कृतिक सम्पदा संरक्षणया नेवाः अभियन्तात नं दु । तर उपस्थिति शून्य सरह । लिम्बु, खम्बु, थारु, मगः, खसानतय्गु न्ह्यसः दु,
‘नेवाःत छाय् सुम्क ?’

अन्तय्,
पहिचानय् आधारित संघीय गठबन्धनया पहिचान सहितया आन्दोलनय् नेतृत्वदायी भूमिका म्हिताच्वंसां थः पार्टीया सः चिसः वा पार्टी चीधंगु जूगुलिं थ्वया खँ नेवाःतय्सं पत्याः मजुइगु स्वाभाविक खः । तर ओली सरकारया थपाय्च्वः पहिचान बिरोधी पलाः न्ह्याकाच्वंगु सीकं सीकं छाय् नेवाःत सतकय् मवःगु खः ले ? देसय् अतिकं भ्रष्टाचार, बलात्कार, हत्याया श्रृंखला अप्वयावं वनाच्वन ।

नेवाःतय्गु सम्पदा, संस्कृति जक मखु व्यक्तिगत छेँ, लागा अतिक्रमण यानाः विकासया नामय् विनाश यानाच्वंसां सकल नेवाःतय्सं चिउताः मतः छाय् ? थीथी पार्टीया सदस्य जुयाच्वंसां गलत खँयात गलत धायेगु हिम्मत व आँट छाय् मयात ? झी सकसिनं मनन याये ।

सम्बन्धित बुखँ

LEAVE YOUR COMMENTS