सिंहं शिकारीया शिकार न्यायेकल

दक्षिण अफ्रिकाया क्रूजर नेशनल पार्कय् छम्ह शिकारी हे सिंहया शिकार जूगु दु । प्रहरीं धाःकथं छम्ह शंकास्पद शिकारीयात सिंहत जानाः नयाबिउगु दु । सिंहतय्सं उम्ह शिकारीया म्ह छम्हं नयाबिउगु दुसा छ्यं व छुं ला कुचा जक ल्यनाच्वंगु अवस्थाय् लूगु खः । लिम्पोपो प्रान्तया प्रहरी मोत्शे एनगोएपें समाचार एजेन्सी एएफपीयात धाःगु दु, ‘उम्ह शिकारी लिक्कसं च्वंगु गेमपार्कय् शिकार यानाच्वंबलय् सिंहं आक्रमण याःगु जुइमाः ।’ दक्षिण अफ्रिकाया छगू न्यूज पोर्टल आइविटनेश न्यूजं सीम्हया लाकुचा लिक्कसं छगू लोड यानातःगु राइफल नं लूगु खः । उकिं उम्ह मनू शिकारी जुइमाः धयागु अनुमान याःगु खः ।

लिम्पोपा प्रान्तय् थौंकन्हय् सिंहया अवैध शिकार तच्वया वनाच्वंगु दु । अफ्रिका व थनं पिने सिंहया म्हया छुं ब्व परम्परागत वासः दयेकेगु निंतिं आः नं छ्यलाबुला यायेगु जुयाच्वंगु दु । अथेहे सिंह क्वेँय् व छुं छुं अंग दक्षिण पूर्वी एशियाय् तसकं माग दु । थन धुंया क्वेँया पलेसा सिंहया क्वेँ छ्यलेगु यानाहयाच्वंगुलिं सिंहया शिकार नं अप्वया वनाच्वंगु खः ।जनवरी २०१७ य् लिम्पोपोय् जक स्वम्ह मिजंपिं सिंह स्यानातःगु अव स्थाय् लुइकूगु खः । उमित विष नकाः स्यानाः छ्यः व तुति ध्यनाः यंकातःगु खः ।

सम्बन्धित बुखँ

LEAVE YOUR COMMENTS