सांसदया ६ करोड विरुद्ध रिट दायर

येँ – निर्वाचन क्षेत्र विकास यायेगु धासें सांसदतय्त ६÷६ करोड बजेट बिउगु संविधान अःखः जूगु धासें सर्वोच्च अदालतय् रिट दायर जूगु दु । अधिवक्ता पारसमणि भट्टराईया उगु रिट सर्वोच्चया इजलाशं दर्ता याकूगु खः । आर्थिक दँ ०७६÷७७ या बजेटया २१३ नम्बर बुँदाय् सांसदयात ६ करोड बीगु व्यवस्था संविधानया धारा १, ४, ५६ व ५७ लिसे मिले मजू धासें उगु बुँदायात उत्प्रेषणया आदेशं बदर यायेमाःगु माग रिटय् यानातःगु दु ।

निर्वाचन क्षेत्रया पूर्वाधार विकासया निंतिं सांसदतय् नामं बजेट छुटे यायेत्यंगु धासें उकियात पनेत भट्टराईं बजेट वयेन्ह्यः हे रिट तःगु खः । रिटय् न्हापा बिउगु ४ करोड बदर यायेत व आः बीत्यंगु ६ करोड नं पने माःगु माग यानातःगु दु ।

उगु रिट सर्वोच्चया रजिष्ट्रार लालबहादुर कुँवरं वंगु सोमवाः दरपीठ याःगु खःसा बिहीवाः न्यायाधीश डम्बरबहादुर शाहीं हानं दर्ता यायेत आदेश बिउगु खः । रिटय् यदि सांसदपिंत बजेट बीगु खःसा संघीयता हे असफल जुइगु जक मखु राज्ययात अर्बौं तकाया घाटा जुइगु जुयाः थुकियात कार्यान्वयन मयाकेत माग यानातःगु दु ।

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन