जुकरबर्गयात फेसबुकया अध्यक्षं चीकेगु कुतः असफल
एजेन्सी- फेसबुकया संस्थापक मार्क जुकरबर्गयात फेसबुकया अध्यक्ष पदं चीकेगु छगू कुतः असफल जूगु दु । बिहिवाः जूगु फेसबुकया वार्षिक साधारण सभाय् जूगु मतदान लिपा जुकरबर्ग फेसबुकया प्रमुख कार्यकारी अधिकृतया लिसें संचालक समितिया नं अध्यक्ष जुया हे च्वनीगु जूगु दु ।
फेसबुकय् जुकरबर्गया ६० प्रतिशत शेयर दु, यदि व थम्हं हे थःगु विरुद्ध मत तःगु जूसा जक व अध्यक्ष पदं चिलेमालीगु जुइ । तर यक्वसिनं वयात अध्यक्ष पद त्याग यायेत इनाप यासें जुकरबर्गं थःविरुद्ध मत धाःसा मतल । वयात अध्यक्ष पद त्वःतेत इनाप यानाच्वंपिं लगानीकर्तातय्सं यदि छगू जक पदय् च्वंगु जूसां कम्पनी सञ्चालनय् अझ ध्यान बीफइगु तर्क तयाच्वंगु दु ।
जुकरर्बर्गयात अध्यक्ष पदय् चीकेगु कुतः यानाच्वंपिं मध्ये छगू ७० लाख डलर बराबरया शेयर दुगु ट्रिलियम एसेट म्यानेजमेन्ट नं खः । ‘संसारया छगू विशाल कम्पनीइ आः जुकरबर्गं निगू महत्वपूर्ण पद कयाच्वंगु दु । यदि व प्रमुख कार्यकारी अधिकृतया भूमिकाय् जक केन्द्रित जुयाः मेपिंत स्वतन्त्रतापूर्वक संचालक समितिया अध्यक्षता याकेबिउगु जूसां तसकं बांलाइगु खः’ ट्रिलियमया वरिष्ठ उपाध्यक्ष जोनस क्रोनं बिबिसीयात धाःगु दु ।
ल्यारी पेज व एल्फबेटया लिसें बिल गेट्स व माइक्रोसफ्टया उदाहरणबिसें वय्कलं संस्थापक हे संचालक समितिया अध्यक्ष जुयाच्वने म्वाः धयागु तर्क तयादीगु खः ।
दछि न्ह्यवनिसें गोपनीयता व सुचना सुरक्षाया खँय् विवाद वयाच्वंसां जुकरबर्गया नेतृत्वय् फेसबुकं धाःसा अझ अप्वः कमाइ यानाच्वंगु दुसा यक्व प्रयोगकर्तातय् दथुइ थ्यनाच्वंग्ु दु ।
बिहिवाः जूगु साधारण सभाय् जुकरबर्गं स्वतन्त्र अध्यक्ष नियुक्त यायेगु सम्बन्धी न्ह्यसःया लिसः धाःसा बी चाहे मजुल । जुकरबर्गं थ्वयां न्ह्यः धाःसा थःगु नेतृत्वया बचाउ यासें धायेगु यानाच्वंगु दु कि, ‘फेसबुक थेंज्याःगु अभूतपूर्व संस्था दयेकेबलय् छुं खँ स्यनेफु, तर झीसं त्रुटी पाखें हे सयेका वयाच्वनागु दु कि मदु, उकिं हे मनूतय्सं झीत उत्तरदायी दयेकी धयागु जितः ताः ।’
LEAVE YOUR COMMENTS