भारतं हाकनं पेट्रोल ट्यांकर पन

भद्रपुर – भारतं पूर्वी नाकां नेपाः दुहां वयेत्यंगु पेट्रोलियम पदार्थ ज्वना वःगु ७३ गः ट्यांकर पश्चिम बंगालया पानीट्यांकी भन्सारय् पनाबिइवं पूर्वय् पेट्रोलियम पदार्थया अभाव सुरु जूगु दु । अनलाइन माध्यमं भन्सार इन्ट्री सिस्टम सुरु यानागु धासें भारतीय भन्सारं प्यन्हु न्ह्यवनिसें चिकं कुबिया वःगु नेपाली ट्यांकरयात नाकाय् हे पनातःगु खँ नेपाल आयल निगम चारआली कार्यालयया सुचना अधिकृत लोकमणि पौडेलं कनादीगु दु ।

वय्कःया कथं पेट्रोलियम पदार्थ कुबिया वःगु मेचीया ५३ गः व विराटनगरया २० गः यानाः ७३ गः ट्यांकर पानीट्यांकी नाकाय् थाःगु दु । ट्यांकर नेपाः दुहां वयेमफयेवं मेचीया फुक्क पेट्रोल पम्प बन्द जुयाच्वंगु दु । प्यन्हु न्ह्यवनिसें झापा, इलाम, पाँचथर व ताप्लेजुङ्ग लिसें ६० गू पेट्रोल पम्प बन्द जुइगु थन चिकंया हाहाकार जूगु दु ।

सूचना अधिकृत पौडेलया कथं मेचीया प्यंगू जिल्लाय् जक न्हिं छगू लाख लिटर पेट्रोल व स्वंगू लाख लिटर डिजेल खपत जुइ । वय्कःया कथं भारतं शुक्रवाःनिसें नेपाल निर्यात जुइगु सामानय् अनलाइन पाखें तथ्यांक तयेगु सुरु याःसां सिस्टमय् समस्या वःगु धासें नेपाली ट्यांकरयात पनातःगु खः । पौडेलं भारतीय भन्सारयात आः म्यानुल सिस्टमपाखेंसां तथ्यांक तयाः नेपाली ट्यांकर त्वःताबीत इनाप यानागु खँ पौडेलं धयादीगु दु ।