येँ मनपापाखें पेट्रोल पम्पया अनुगमन

येँ – येँ महानगरपालिकां थःगु क्षेत्रय् दुने लाःगु पेट्रोल पम्पया अनुगमन याःगु दु । झिन्यान्हु तक याःगु थ्व अनुगमनय् मुख्यत बालाजु, कलंकी व कालिमाति लागाय् च्वंगु पेट्रोल पम्पया अनुगमन जूगु खँ धाःगु दु । थौंकन्हय् महानगर दुने संचालनय् वयाच्वंगु पम्प बस्ती लिक्क लाःगु व सतकया नं तसकं सतिक लाःगुलिं अनुगमन यानाः वास्ताविकता स्वयेगु ज्या जूगु खँ महानगरया सहरी सुशाधन विभागया प्रमुख हरि कुँवरं राससयात जानकारी बिउगु दु ।

कुँवरया संयोजकत्वय् येँ मनपा, ट्राफिक ज्याकु, नेपाल आयल निगम व शहरी विभागया प्रतिनिधि दुगु कार्यदल गठन यानाः अनुगमन याःगु खः । आः थ्व समितिं बिउगु प्रतिवेदन स्वयां अप्वः जोखिम दुगु थाय्या च्वंगु पेट्रोल पम्प चीकेगु प्रक्रिया सुरु जुइगु खँ धाःगु दु ।
प्रतिवेदनया आधारय् स्थान्तरण यायेजिउगु पम्पयात स्थान्तरण यायेगु व मजिउगु पम्पया निंतिं आवश्यक व्यवस्थापन यायेत सम्बन्धित निकायय् इनाप याना छ्वयेगु खँ वय्कलं धयादीगु दु ।

बस्ती लिक्क व लँ सिथय् लाःगु पम्पया कारणं जोखिम अप्वःगु गुनासो वयाच्वंगुलिं महानगरं अध्ययन न्ह्याकूगु खः । सतकया सतिक च्वंगु पेट्रोल पम्पय् पेट्रोल जायेकेत दिकातइगु गाडीं यानाः लँ तकं जाम जुइगु जुयाच्वंगु दु । अथेहे बस्ती लिक्क लाःगु पम्पं यानाः मानवीय जोखिम अप्वयाच्वंगु खँ धाःगु दु ।थौंकन्हय् येँ महानगर दुने जक ७५ गू पम्प संचालनय् वयाच्वंगु दु ।

सम्बन्धित बुखँ

LEAVE YOUR COMMENTS