इरानयात ख्यायेत अमेरिकापाखें युद्धक पानीजहाज परिचालन

अमेरिकां इरानयात स्पष्ट व तप्यंक सन्देश बीगु निंतिं मध्यपूर्वय् युद्धपोत सहितया लडाकू पानीजहाज परिचालन याःगु दु । अमेरिकी राष्ट्रिय सुरक्षा सल्लाहकार जोन बोल्टनं ‘समस्या वयेफुगु सम्भावना व तनाव अप्वया वनाच्वंगु संकेत व ख्याच्वःतय् कारणं युद्धपोत परिचालन यानागु खँ धाःगु दु । बोल्टनं अमेरिकाया छुं नं कथंया आक्रमणया प्रतिकार यायेगु खँ धाःगु दु ।

बोल्टनं छगू विज्ञप्ति जारी यासें धाःगु दु, ‘अमेरिकां युएसएस अब्राहम लिंकन क्यारियर स्ट्राइकर गु्रप व उकिया सहयोगी युद्ध समूहयात युएस सेन्ट्रल कमाण्ड क्षेत्रय् इरानयात थः वा थःगु समर्थक राष्ट्रतय्त जुइफुगु छुं नं कथंया आक्रमणया अवस्था क्वातुक प्रतिक्रमण यायेगु जुइ धयागु स्पष्ट व तप्यंक सन्देश बीगु निंतिं परिचालन याःगु खः ।’

वय्कलं अमेरिकां इरानलिसे युद्ध चाहे जूगु मखुसां छुं नं कथंया आक्रमणया अवस्थाय् पूर्ण तयार दुगु खँ नं धयादीगु दु । अमेरिकां आः परिचालन याःगु लडाकू पानीजहाजं वंगु अप्रिलया अन्त्य निसें युरोपय् युद्धया अभ्यास यानाच्वंगु खः । थ्वहे दथुइ फिनल्यान्डया भ्रमणय् वनाच्वंम्ह विदेशमन्त्री माइक पोम्पेओं अमेरिकां इरानय् छुं गतिविधि खंकूगु व थुकिं तनाव वृद्धिया संकेत याःगु खँ धयादीगु दु ।

अमेरिकी राष्ट्रपति डोनाल्ड ट्रम्पं थगुने इरान व मेमेगु देय्लिसे अमेरिकां सन् २०१५य् यानातःगु परमाणु सम्झौतापाखें ल्हाः लिकाःगु खः । अमेरिकां इरानया पेट्रोलियम पदार्थय् तयातःगु प्रतिबन्ध कडा यायेगु झ्वलय् वंगु वालं निसें चीन, भारत, जापान, दक्षिण कोरिया व टर्कियात इरानपाखें चिकं न्यायेगु निंतिं बियातःगु छुट नं क्वचायेकेगु घोषणा याःगु खः ।

अथेहे अमेरिकां इरानया रिभोलुसनरी गार्ड कोरयात नं विदेशी आतंककारी पुचः धकाः हाकुगु धलखय् लाकूगु दु ।अमेरिकी प्रतिबन्धया कारणं इरानया आर्थिक अवस्था बांमलाक स्यना वनाच्वंगु दु । इरानी मुद्रा आःतकया हे दकलय् तःधंगु अवमूल्यन जुयाच्वंगु दु । थुकिं यानाः विदेशी लगानीकर्ता इरानय् लगानी यायेत अनिच्छुक जुयाच्वंगु दुसा इरान सरकारविरुद्ध अनया हे जनता नं विरोधय् कुहां वयाच्वंगु दु ।

सम्बन्धित बुखँ

LEAVE YOUR COMMENTS