येँ – इटालियन ठेकेदार कम्पनी मेलम्ची खानेपानी आयोजना दयेकेगु ज्या त्वःताः बिसिउँ वंसां आः तक आयोजना न्ह्याकेगु लागिं छु यायेगु धकाः ठोस निर्णय याये मफयाच्वंगु खँ सीदुगु दु । मेलम्ची आयोजना दयेकेगु निंतिं खानेपानी मन्त्री बिना मगर व आयोजनाया पदाधिकारीतय् दथुइ हे विवाद ब्वलनाच्वंगुलिं नं आयोजनाया ज्या थाति लानाच्वंगु खः ।
ठेकेदार कम्पनी बिसिउँ वंगु प्यला दयेधुंकाः नं आयोजना न्ह्याकेगु निंतिं खानेपानी मन्त्रालयया लिसें मेलम्ची खानेपानी आयोजनां खास छुं हे ज्या यानामच्वंगु खँ धाःगु दु । सूत्रया कथं आयोजनाया ज्या न्ह्याकेबलय् छुं समस्या वल धाःसा उकिया जिम्मेवारी पूर्ण रुपं कर्मचारीं कायेमाःगु अवस्था वःगुलिं नं आयोजनाया कर्मचारीत छुं नं कथंया खतरा नालेत तयार मजुयाच्वंगु खः ।
कर्मचारी संयन्त्रं याइगु छुं नं निर्णययात अख्तियार वा अदालतय् मुद्दा तया बीगु प्रवृत्तिया कारणं यानाः नं आयोजनाया कर्मचारीत छुं नं निर्णय यायेत ग्यानाच्वंगु खँ धाःगु दु । प्रधानमन्त्री व मन्त्रीया निर्देशनं ज्या यायेबलय् थःपिं फँसे जुइफइगु ग्याःचिकुं यानाः नं मेलम्ची बारे निर्णय यायेत कर्मचारीत ग्यानाच्वंगु खः ।
कर्मचारीया थ्व ग्याःचिकुं यानाः मेलम्ची आयोजना सम्पन्न जुइत थाकुइगु खँ धाःगु दु । मेलम्ची खानेपानी आयोजना पूवंकेगु खःसा आः मन्त्रालयं निर्णय यायेमाः वा प्रधानमन्त्री केपी शर्मा ओलीं हे थुकी चिउताः प्वंकेमाःगु खँ सम्बन्धित कर्मचारीतय्सं धायेगु यानाच्वंगु दु । तर प्रधानमन्त्री ओली नं सीएमसी बिसिउँ वनेधुंकाः आयोजनाया बारे छुं हे चिउताः मतयाच्वंगु खँ सूत्रं धाःगु दु ।
मेलम्ची आयोजना द्रुत रुपं न्ह्यानाच्वंगु इलय् प्रम ओली बालकुमारीइ फोहोर लः प्रशोधन यायेगु केन्द्रया उलेज्या यासें आयोजना आः खासाया गतिं मखु जापानीज गाडीया गतिं न्ह्याइ धकाः धयादीगु खः । तर मेलम्ची बिसिउँ वनेधुंकाः धाःसा आयोजनाया बारे खास हे चिउताः मकयाच्वंगु खँ सूत्रं धाःगु दु ।
मेलम्ची आयोजनायात धात्थें याकनं क्वचायेकेगु खःसा मेलम्ची विकास समिति गठन आदेश संशोधन यायेमाःगु सुझाव सम्बन्धित विज्ञतय्सं बियाच्वंगु दु । समितिया आदेश संशोधन यानाः मन्त्रीयात हे विकास समितिया अध्यक्ष दयेकल धाःसा जक मेलम्ची समस्या समाधान जुइगु सुझाव नं विज्ञतय्सं बियाच्वंगु दु । आः मेलम्ची प्रशासनिक जक मखु राजनीतिक नेतृत्वयात नं जिम्मा बीमाःगु सुझाव नं वयाच्वंगु दु ।
LEAVE YOUR COMMENTS