नेपालं मलेसियायात ८ विकेटं बुकल

आइसिसी यु—१९ विश्वकप एसिया क्षेत्र छनोटय् नेपालं मलेसियायात ८ विकेटं बुकूगु दु । मलेसियां बिउगु ९३ रनया लक्ष्य नेपाल १३ ओभरय् निगू विकेटया क्षतिइ पूवंकूगु खः । नेपाःया निंतिं ओपनर रित गौतमं नटआउट ३९ रन दयेकूगु खःसा आसिफ शेखं २६, पवन सर्राफं १६ व रोहितकुमार पौडेलं ६ रन दयेकल ।

टस त्याकाः न्हापा फिल्डिङ्ग याःगु नेपालं मलेसियायात ९२ रनय् अलआउट याःगु खः । निर्धारित ५० ओभरया कासाय् मलेसिया ३३ ओभरय् अलआउट जूगु खः । मलेसियायात ९२ रनया म्हो स्कोरय् आउट यायेगु झ्वलय् नेपाःया कुशल मल्ल व पवन सरार्फं स्वंगू स्वंगू विकेट काःगु खः । अथेहे कमल सिंह ऐरीं निगू व सागर ढकालं छगू विकेट काल ।

मलेसियाया छम्ह कासामि रन आउट जूगु खः ।न्हापांगु कासाय् सिंगापुरयात २१७ रनं बुकूगु नेपाल निगूगु कासाय् वा वःगुलिं म्हितेमफइगु जुइवं युएइ नाप डकवर्थ लेविस मेथडया कारणं मुक्कं छगू रनं पराजित जूगु खः । थ्व धेंधेंबल्लाय् शीर्ष थासय् लाःगु छगू जक टिमं विश्वकप म्हितेखनी । नेपालं आः विश्वकप म्हितेगु निंतिं ल्यं दुगु दक्व कासा त्याकाः जक मगाः, आःतक अपराजित युएइ नं छगू कासाय् पराजित जुइमाली ।