रोनाल्डिन्होया काय थःगु म्हसिकाः सुचुकाः ब्राजिलियन क्लबय्

ब्राजिलया महान कासामि रोनाल्डिन्होया काय् जोएओ मेन्डिस थःगु क्षमतां ब्राजिलया क्रुजएइरो क्लबय् अनुबन्धित जूगु दु । सुं नं महान कासामिया सन्तानं थः मांअबुपाखें थःगु क्यारियरया निंतिं ग्वाहालि याइ धयागु आशा याइगु न्हूगु खँ मखु तर रोनाल्डिन्होया १४ दँ दुम्ह काय मेन्डिस ट्रायल बीत क्रुजएइरो वःबलय् थः अबुया नां सुचुकल । मेन्डिसं अबुया नामं मखसे थःगु क्षमतां ट्रायल पास यायेत वन, अले सफल नं जुल ।

ट्रायल पास जुइधुकाः तिनि मेन्डिसं थः रोनाल्डिन्होया काय जूगु जानकारी क्लबयात बिउगु खः । क्रुजएरो क्लबं धाःगु दु ‘मेन्डिस रोनाल्डिन्होया काय खःसां वं थः चर्चित कासामि रोनाल्डिन्होया काय धकाः मधाः, थःगु क्षमतां न्हापां ट्रायल पास यात, अले जक क्लबयात थः अबुया बारे जानकारी बिल ।’ रोनाल्डिन्हो ब्राजिलया हे छम्ह उत्कृष्ट कासामि खः ।

विश्वकप त्याकेधुंकूम्ह रोनाल्डिन्हाें बार्सिलोना, पिएसजी व एसी मिलानं म्हितेधुंकूगु दु ।क्लबया निर्देशक अमारिल्दो रिबेरों धाःगु दु ‘रोनाल्डिन्होया काय छम्ह बांलाःगु शारिरीक बनोट व उच्च दक्षता दुम्ह कासामि खः । व एरिया कासामि व सेकेण्ड स्ट्राइकर जुयाः नं म्हितेफु । वयागु स्पीड व फिनिस नं बांलाः ।’ मेन्डिस सन् २०२५ तकया निंतिं क्लबय् अनुबन्धित जुइधुंकूगु दु । अनुबन्ध लिपा मेन्डिसं थःगु म्हगस पूवंगु व क्लबया फ्यानया निंतिं गोल यायेगु खँ धाःगु दु ।