ने. सं. ११४४ चौलाथ्व दशमी -

कुवेत आम माफी बिउसां नेपाःमि अन हे

येँ – कुवेत सरकारं थःगु देशय् अवैध रुपं च्वनाच्वंपिं विदेशीतय्त आममाफी बियाः थःथःगु देशय् लिहां वनेगु अवसर बिउसां नं अन अवैध रुपं च्वनाच्वंपिं नेपाःमितय्सं उकिया लबः धाःसा मकाइगु जूगु दु । अन अवैध रुपं च्वनाच्वंपिं नेपाःमित आम माफीया अवसर मकासे बरु ज्वंसा थज्वँ धकाः अन हे च्वंच्वनेगु मुडय् दुगु खँ सीदुगु दु ।
कुवेतया सरकारी तथ्यांक कथं थौंकन्हय् अन ७० हजारम्ह ज्यामित ज्या यानाच्वंगु दु ।

उकी मध्ये २५ हजारम्ह मिसापिं खः । २२ हजार मिसा ज्यामित छेँज्या यायेगु ज्याय् खटे जुयाच्वंगु दु । मिसा ज्यामित धाःसा अप्वः यानाः नेपाःया कानूनया कारणं यानाः लिहां मवनेगु अवस्थाय् थ्यंगु खँ धाःगु दु । नेपाः सरकारं थौंकन्हय् मिसा ज्यामितय्त कुवेत मवछ्वयेगु धकाः निर्णय याना तःगु दु । उकिं कुवेतय् च्वनाच्वंपिं मिसा ज्यामित नेपाः लिहां वल धाःसा उपिं हानं कुवेत वने खनी मखु ।

अय् जूगुलिं उपिं बरु अवैध हे जूसां नं कुवेतय् अप्वः ई बिकाः च्वनाच्वनेगु अवस्थाय् लानाच्वंगु खँ धाःगु दु । मेपिं मिजं ज्यामित धाःसा कुवेतय् वयाः नं बांलाःगु कम्पनीइ ज्या याये मखंगु, न्हापा धाःगु थेंज्याःगु ज्याला काये मखंगु आदि कारणं यानाः नेपालय् कयातःगु त्यासा तकं पुले मफुनिगु अवस्थाय् थ्यंगुलिं थः च्वनेगु ई फूसां नं सुलाः सुलाः च्वनाच्वंगु खः ।

कुवेत सरकारं आम माफीया सुचं जारी यायेधुंकूसां नं आः तक अन छम्ह हे नेपाःमिं लिहां वने धकाः निवेदन मबिउगु खँ कुवेतस्थित नेपाली दुतावासं धाःगु दु । थौंकन्हय् कुवेत सरकारं धाःसा विदेशी ज्यामित ज्याय् तयातःगु कम्पनीया ज्याकुथी हे वयाः उमिगु कार्ड स्वयाः अवैध खः मखु धकाः मालेगु शुरु यायेधुंकूगु दु । उकी ग्वःम्ह नेपाःमि ज्वन धइगु खँ धाःसा सीमदुनि ।