आः सहकारीं ठगे याये फइ मखुत

येँ – छम्ह हे मनुखं तःगूमछि सहकारी संस्थाय् त्यासा कयाः बिसिउँ वनीगु समस्या आः याकनं ज्यनीगु खँ येँ महानगरपालिका सहकारी विभागया प्रमुख नमराज ढकालं ‘नेपालभाषा टाइम्स’ यात कनादीगु दु । संघीय सरकारया सहकारी विभागं दयेकूगु कोपामिस सफ्टवेयरया कारणं आः फुक्कं सहकारीया दुजःपिनिगु तथ्यांक दइगु जुयाः छम्ह हे मनुखं तःगू सहकारीइ त्यासा काये मफइगु जूगु खः ।

लिसें आः छम्ह मनू छगू हे जक सहकारीया दुजः जुइ दइगु व्यवस्था नं यायेत्यंगु दु । छम्ह हे मनू छगुलिं अप्वः संस्थाय् दुजः जुइ मदइगु जुयाः सहकारीइ त्यासा कायेत नं समस्या वइगु कारणं थ्व सफ्टवेयरं सहकारी संस्थाया जोखिम म्हो जुइगु खँ नं वय्कलं कनादिल । सहकारीया समस्या समाधान यायेगु कथं ब्लाय्क लिस्ट तयेगु लिसें ऋण असुली प्राधिकरण नीस्वनेगु तयारी जुयाच्वंगु जानकारी बियादिसें वय्कलं आपालं समस्याय् लानाच्वंगु सहकारी बारे विभागयाके फुक्कं जानकारी दइगु जुयाः अज्याःगु सहकारीयात इलय् व्यवस्थापन यायेगु ज्या यायेफइगु खँ कनादिल ।

सहकारी सम्बन्धी न्हूगु नियमावली वयेवं ऋण असुली प्राधिकरण गठन यायेफइगु जानकारी बियादिसें वय्कलं देय्न्यंकंया सहकारीया तथ्यांक संघीय सरकारयाके दइगु जुयाः सुं नं व्यक्तिं आः सहकारी मार्फत ठगी याये मफइगु दावी नं वय्कलं यानादिल । महानगरपालिका दुने जक थौंकन्हय् सहकारीतय्सं ध्यबा मबिल धकाः न्हिं न्यागू धइथें उजुरी वइगु जुयाच्वंगु दु ।

सम्बन्धित बुखँ

LEAVE YOUR COMMENTS