जापानय् ज्यामि यंकेगु निंतिं सम्झौता
येँ – जापानय् नेपाःमि ज्यामि यंकेगु निंतिं सोमवाः नेपाः व जापान दथुइ श्रम सम्झौता जूगु दु । नेपाः सरकारपाखें कार्यवाहक श्रम सचिव रामप्रसाद घिमिरे व जापानपाखें जापानी राजदूत मासामिची साइगों नेपाःमि ज्यामि यंकेगु निंतिं समझदारीपत्रय् हस्ताक्षर याःगु खः । यलय् छगू ज्याझ्वःया दथुइ जूगु थ्व समझदारी कथं जापानं सरकारी संयन्त्रपाखें दक्ष ज्यामित जापान यंकीगु जुइ ।
थ्व सम्झौता जूगु निवाः दुने नेपाःमि ज्यामितय् छनोट ज्या सुरु जुइगु खँ धाःगु दु । जापानं सम्झौताय् हे ज्यामित ल्ययेगु निंतिं स्वंगूगु पक्षयात तयेदइमखु धयागु शर्त तयातःगु दु । उकिं जापान यंकेगु ज्या तप्यंक सरकारपाखें हे जुइगु व छुं नं रोजगार कम्पनीपाखें मजुइगु जूगु दु ।
जापानं कृषि, होटल, उद्योग, सुरक्षा, नर्सिङ्ग सेवा, सवारीसाधन मर्मत, निर्माण उद्योगलिसें थीथी झिंप्यंगू क्षेत्रय् ज्या यायेगु निंतिं नेपाःमि ज्यामि यंकेत्यंगु खः । सम्झौता कथं योग्य ज्यामि धयातःगु वर्गय् नं थप निगू वर्ग तयातःगु दु । न्हापांगु वर्गय् श्रमिकतय् निंतिं सीप व सम्बन्धित ज्याया अनुभव आवश्यक जुइ ।
जापानं कृषि, होटल, उद्योग, सुरक्षा, नर्सिङ्ग सेवा, सवारीसाधन मर्मत, निर्माण उद्योगलिसें थीथी झिंप्यंगू क्षेत्रय् ज्या यायेगु निंतिं नेपाःमि ज्यामि यंकेत्यंगु खः ।
थज्याःपिं ज्यामि अप्वलय् न्यादँ तक जापानय् च्वनेदइ । निगूगु वर्गय् लाःपिं उच्च तहया सीप दुपिं जुइमाः । थज्याःगु ज्यामितय्सं धाःसा कार्यावधि थप यानाः जापानय् च्वनेदइसा थुमिसं थः छेँजःपिंत नं जापान यंकेदइ । नेपाःमि दक्ष ज्यामि यंकेगु सम्झौता जूसां जापानं गुगु गुगु क्षेत्रय् गुलि गुलि ज्यामि यंकेगु धयागु धाःसा निश्चित याःगु मदुनि ।
श्रम मन्त्रालयया कथं जापानय् ज्यामित छ्वये निंतिं मन्त्रालय् दुने हे अलग हे विभाग चायेकेत्यंगु दु । थुकी सम्झौताकथं ज्या यायेगु निंतिं छगू प्राविधिक पुचः नं गठन याइगु खँ धाःगु दु । थ्व पुचलं जापानं यंकीपिं ज्यामितय् ल्याः व ज्यामितय् लागत खर्च विषयया खँ क्वःछिइ ।
जापानय् ज्याय् वनेत जापानी भाय् बांलाक ल्हाये सःम्ह व ब्वने सःम्ह जुइहे माः ।
थुकिया निंतिं एनफोर भाषा परीक्षा धाःसा पास जूगु हे जुइमाः । जापानय् ज्याय् वंपिं नेपाली ज्यामितय्त रोजगारया सेवा व सर्त जापानी नागरिक सरह हे समान व्यवस्था दइगु खँ समझदोरीपत्रय् न्ह्यथनातःगु दु । थुकिं यानाः जापानय् रोजगारीया निंतिं वनीपिं नेपाःमि ज्यामि सुरक्षित जुइगु खँ धाःगु दु ।
उकिं नं नेपाःमितय्त जापानय् रोजगारीया निंतिं वनेगुलिइ तच्वःगु आकर्षण दयाच्वंगु दु । जापानं नेपाःमि ज्यामि यंकीगु खँ पिहां वयेवं हे थाय्थासय् जापानीज भाय् स्यनीगु इन्ष्टिच्यूट चालावःगु खः ।
LEAVE YOUR COMMENTS