स्वनिगलय् झिंन्यासःगः सवारी साधनय् ह्वील लक

ये – ट्राफिक प्रहरीं स्वनिगलय् जक थीथी थासय् लाःलाःथे पार्किङ्ग यानाः १५४८ गः सवारी साधनयात कारवाही यायेगु झ्वलय् ह्वील लक यानाबिउगु दु । महानगरीय ट्राफिक प्रहरी महाशाखां स्वनिगलय् जुइगु तच्वःगु जाम व्यवस्थित यायेत व अनाधिकृत पार्किङ्ग निरुत्साहित यायेत थथे ह्वील लक यायेमाःगु खँ धाःगु दु ।

महाशाखाया प्रमुख वरिष्ठ उपरीक्षक वसन्तकुमार पन्तं अनाधिकृत रुपं पार्किङ्ग यानातःगु सवारी साधनय् विशेष कारवाही अन्तर्गत ह्वील लक यानागु खँ कनादिल । ‘लँय् लाःलाःथे पार्किङ्ग यानातइगु सवारी साधनय् ह्वील लक यानाः कारवाही यानागु खः’ वय्कलं धयादिल ।
मंसिर ८ गते निसें सुरु जूगु थ्व अभियानय् निचाः घःचाः व प्यचाः घःचाःया सवारी साधनय् ह्वील लक यायेगु यानाच्वंगु खः ।

महाशाखाय् सतकय् पंगः जुइक लाःलाःथे पार्किङ्ग यानातःगु गाडीइ ह्वील लक यानाः न्यासः निसें द्वःछि तका तक जरिवाना पुइका वयाच्वंगु दु ।ट्राफिक प्रहरीं ह्विल लक याइबलय् सम्बन्धी सवारी चालकं थ्व कारवाही अन्तर्गत गन, सुयात स्वापू तयेगु धयागु बारे विवरण तयाः स्टिकर तिकाथकेगु याना वयाच्वंगु दु । महाशाखाया कथं ह्विल लक चायेकेत स्टिकर च्वयातःगु ट्राफिक प्रहरीया मोबाइल वा ट्राफिक हटलाइन १०३ य् स्वापू तयेमाः ।

सम्बन्धित बुखँ

LEAVE YOUR COMMENTS