विषाक्त अय्लाः त्वनाः सीपिं ९३ म्ह थ्यन

भारतया आसामय् विषाक्त अय्लाः त्वनाः सीपिनि ल्याः ९३ म्ह थ्यंगु दु । आसामया गोलाघाट जिल्लाय् लाःगु छगू च्या बगानय् ज्या याइपिं मजदूरत विषाक्त अय्लाः त्वनाः सीगु खः । स्थानीय प्रहरीं धाःकथं जोरहाट व गोलाघाट धाःथासय् च्वंपिंसं विषादी अय्लाः त्वंगु खः । सीपिं मध्ये तःम्ह मिस्त नं दुगु खँ धाःगु दु ।

विषाक्त अय्लाः त्वःपिं मेपिं सछिम्हं मल्याकं मजदूरत स्थानीय अस्पतालय् उपचार यानाच्वंगु खँ धासें सीपिनि ल्याः अझं अप्वयेफुगु खँ धाःगु दु । प्रहरीं धाःकथं निसत्यां मल्याक मनूतसं बिहिवाः छगू हे अय्लाः पसलं न्यानाहःगु अय्लाः त्वंगु खः । प्रहरीं थ्व घटनाय् अय्लाः मिउपिं निम्हेसित ज्वनेधुंकूगु दु ।

आसामया मुख्यमन्त्री सर्वानन्द सोनोवालं थ्व घटनायात कयाः छानविन यायेत आदेश बीधुंकूगु दु । सीपिंसं त्वंगु अय्लाः स्थानीय मनूतय्सं हे दयेकूगु अय्लाः जूगु खः धाःगु दु । स्थानीय प्रहरी एसपी पुष्कर सिंहं अय्लाः दयेकीबलय् मिथाइल व युरीया छ्यलीगु यानाच्वंगु धासें थज्याःगु रसायन अप्वलकि अय्लाः विषाक्त जुइगु खँ धयादीगु दु ।