न्ह्याथे यानाः नं पानी जहाज !

येँ – प्रधानमन्त्री केपी ओलीं थःगु कार्यकालया दछि पूवंगु लसताय् म्हिगः छक्वलं हे थीथी न्हूगु ज्याया आरम्भ यानादीगुया नापं राष्ट्रया नामय् छगू सन्देश नं बियादिल । वय्कलं म्हिगः शुरु यानादीगु थीथी न्हूगु ज्याखँत मध्ये पानी जहाजया कार्यालय दकलय् अप्वः चर्चाय् वल ।

प्रम ओलीं थम्हं पानी जहाज कार्यालयया उलेज्या यानाबलय् आः यक्वस्यां पानी जहाज गयेगु टिकट नं काये दइ ला धकाः व्यंग्य याइगु सम्भावना दु धासें आः छुं ई लिपा हे नेपाःया पानी जहाज चले जुइगु विश्वास प्वंकादिल । आःयात १६ म्ह कर्मचारी तयाः उलेज्या जूगु थ्व पानी जहाज कार्यालयं आःयात नेपाःया थीथी खुसिइ सञ्चालन जुयाच्वंगु चिचीग्वःगु जहाजया अनुगमन याइगु खँ धाःगु दु ।

तर वय्कलं पानी जहाजया ज्याकू उलेज्या यानादीसां यक्वस्यां धाःसा पानी जहाज सञ्चालनय् अझ नं गाक्क अनुसन्धान मजूगु खँ धाःगु दु । सूत्रतय्सं धाः कथं प्रम ओलीया पानी जहाज चले यायेगु थ्व योजना भारतं गंगा खुसिइ जहाज चले यायेगु धकाः हःगु योजनाय् आधारित जुयाच्वंगु दु । भारतं सन् २०२० तकया दुने नेपाःया गण्डक खुसि तक जहाज चले यायेगु योजनाया घोषणा नकतिनि याःगु खः । आः नेपालं वहे गण्डकंनिसें गंगाय् दुहां वनीगु जहाज यायेगु तयारी यानाच्वंगु खः ।
तर विज्ञतय्सं धाःसा जहाज चले यायेगु लागिं नेपालं गुलि खर्च याइगु खः प्रतिफल धाःसा उकथं वइगु सम्भावना म्हो जक दुगु खँ धयाहःगु दु ।

नेपाःया कोशी खुसिइ नं ८० गः कन्टेनर न्ह्यंगु जहाज चले याये फइ धकाः छगू सम्भावनाया खँ वःगु खः तर उकिया नं प्रयाप्त अध्ययन धाःसा याःगु मदुनि । म्हिगः उलेज्या याःगु पानी जहाज कार्यालयं आः नेपाः दुने व नेपालं पिने चले जुइगु पानी जहाजया अध्ययन, अनुगमन व अनुमति बीगु ज्या जुइ धाःगु दु ।

सम्बन्धित बुखँ

LEAVE YOUR COMMENTS