भनेजुएलाय् धुकुतीया लुँ मीगु सुरु

तच्वःगु आर्थिक संकटय् लानाच्वंगु भेनेजुएलाया सरकारं सरकारी धुकुतिइ च्वंगु लुँ मियाः माःगु ध्यबा मुंकाच्वंगु खँ धाःगु दु । भेनेजुएलां देय्यात माःगु ध्यबा मुंकेत व अर्थतन्त्र स्थिर तयातःगु थःगु स्रोतत मीगु सुरु याःगु प्रमाणत पिहां वःगु खः । थ्व झ्वलय् धुकुतिइ च्वंगु लुँ मियाच्वंगु थप प्रमाणत नं लूगु खँ धाःगु दु । युएईया आबुधावीइ च्वंगु लगानी कम्पनी नुर क्यापिटलं वंगु वालय् जक भेनेजुएलाया केन्द्रीय बैंकपाखें स्वंगू टन लुँ न्यानागु खँ धाःगु दु ।

नुर क्यापिटलं छगू वक्तव्य पितबिसें भविष्यय् भेनेजुएलालिसे थप कारोवार मयायेगु खँ धाःगु दु ।अमेरिकां भेनेजुएलायाके लुँ मयायेत चेतावनी बियाच्वंगु दु । भेनेजुएलाय् आर्थिक प्रतिबन्ध तयाः राष्ट्रपति निकोलस मदुरोयात सत्तां चिइकेगु निंतिं अमेरिकां भेनेजुएला लिसे कारोवार मयायेत ख्याच्वः बिया वयाच्वंगु दु ।

रोयटर्सया कथं वंगु वालय् छगः चिग्वःगु कार्गो विमान भेनेजुएलाया अन्तर्राष्ट्रिय विमानस्थलं स्वंगू टन लुँ ज्वनाः ब्वयावंगु खः । बिबिसीं रुसी विमानत नं उगु विमानस्थलय् वये वने यानाच्वंगु खँ धाःगु दु । तर रुसं धाःसा थुकियात अस्वीकार याना वयाच्वंगु दु । बिबिसीया कथं टर्कीं नं भेनेजुएलाया लुँ न्यानाच्वंगु दु । भेनेजुएलाया लुँ टर्कि जुयाः इरान वनाच्वंगु खँ धाःगु दु । थथे जुल धाःसा अमेरिकाया प्रतिबन्ध उल्लंघन जुइगु धासें टर्कियात नं लुँ मन्यायेत दबाब बियाच्वंगु दु ।

सम्बन्धित बुखँ

LEAVE YOUR COMMENTS