भिआइपी वइबलय् लँ पनेमाःगु कारण बीत सर्वोच्चया आदेश

येँ राष्ट्रपति वा मेपिं भिआइपि वइबलय् सर्वसाधारणया लँ पनेमाःगु कारण लिखित रुपं पेश यायेत सर्वोच्च अदालतं सरकारया नामय् आदेश बिउगु दु ।
न्यायाधीश तेजबहादुर केसीया एकल इजलासं भिआइपी वइबलय् छाय् सर्वसाधारण नागरिकयात लँय् जुइत हे पनेमाःगु धयागु बारे झिंन्यान्हु दुने लिखित लिसः पेश यायेत सरकारया नामय् मंगलवाः आदेश जारी याःगु खः।

आदेशय् भिआइपीया सवारी जुइबलय् सतक खालि यायेमाः, राष्ट्रपति वा मेपिं विशिष्ट व्यक्तिया सुरक्षाया कारण लँ पनेमाः धकाः छु छु कानुनय् न्ह्यथनातःगु दु धयागु बारे नं लिखित लिसः बीत धाःगु दु ।

प्रधानमन्त्री व मन्त्रिपरिषद् कार्यालय, गृह मन्त्रालय व प्रहरी प्रधान कार्यालययात विपक्षी दयेकाः अधिवक्ता ज्ञानेश्वर कोइरालां वंगु माघ १९ गते भिआइपी वइबलय् सर्वसाधारण नागरिकयात लँय् तकं जुइकेमबिइगु यानाः नागरिक अधिकारया हनन याःगु धासें रिट निवेदन तःगु खः ।

नेपाःया संविधानं सकलें नागरिकयात स्वतन्त्रपूर्वक सतकय् यात्रा यायेगु अधिकार बियातःगु दुसां राष्ट्रपति वा मेमेपिं भिआइपी वइबलय् लँ पनाः नागरिकया यात्रा यायेदइगु अधिकार हनन याःगु खँ निवेदनय् न्ह्यथनातःगु दु ।

सम्बन्धित बुखँ

LEAVE YOUR COMMENTS