मौसम खराबं विमान ब्वयेमफुत

यँे – आइतवाः सुथय् मौसम स्यनाच्वंगु कारणं त्रिभुवन अन्तर्राष्ट्रिय विमानस्थल छुं ईया निंतिं बन्द जुल । मौसम खराब जूगु कारणं सुथय् विमान ब्वयेकेगु व दिकेगु यायेमफुगु खँ अन्तर्राष्ट्रिय विमानस्थलं धाःगु दु । स्वनिगलय् ख्वातुक्क खसु वःगुलिं भिजिबिलिटी म्हो जूगुलिं उडान प्रभावित जूगु खः ।

तच्वंगु खसु वयाः भिजिबिलिटी तसकं म्हो जुइवं स्वघौ तक विमान उडान प्रभावित जूगु खः । स्वघौ लिपा मौसमय् सुधार वयेवं उडान सामान्य जूगु खँ विमानस्थलया प्रबन्धक राजकुमार क्षेत्रीं राससयात धयादीगु दु । मौसम खराब जूगुलिं सुथय् विमानस्थलया भिजिबिलिटी १०० निसें २०० मिटर जक दुगु खः ।

८ बजे पाखे छक्वः १६०० मिटर थ्यंगु खःसा ९ बजे हाकनं हजार मिटरय् कुहां वःगु खः । अन्तर्राष्ट्रिय उडानया निंतिं भिजिबिलिटी ८०० मिटर दयेमाःसा अवतरणया इलय् जहाजया प्रकृति कथं चिग्वःगु विमानयात १६०० तक भिजिबिलिटी माः । ३२०० मिटर तक भिजिबिलिटीइ जक फुक्क कथंया जहाज अवतरण यायेफइगु खँ धाःगु दु ।