चाइना साउर्दनपाखें छन्हुं हे स्वंगू लाख यात्रुया सेवा

चिनिया नखः स्प्रिङ फेस्टिभलया चहःपहः सुरु जुइवं चीनया लोकंह्वाःगु विमान कम्पनी ‘चाइना साउदर्न एअरलाइन्सं’ सोमवाः छन्हुं हे स्वंगू लाख यात्रुतय्त सेवा बिउगु दु । वसन्त ऋतुयात लसकुस यासें हनीगु नखः माने यायेत विदेशय् च्वनाच्वंपिं अप्वः धयाथें चिनियाँत छेँय् लिहां वयेगु याइ । अथेहे देय् दुने थीथी थासय् ज्या याः वनाच्वंपिं नं छेँय् लिहां वनी ।

चाइना साउर्दनं सोमवाः जक द्वःछि व च्यासःगू उडान यानाः स्वंगू लाख यात्रुतय्त सेवा बिउगु खँ कम्पनीं धाःगु दु ।क्वानझाओय् मू ज्याकू दुगु थ्व विमान कम्पनीयाक थःगु हे ८४० गः विमान दु । थ्व कम्पनी विश्वया हे स्वंगूगु व एसियाया हे दकलय् अप्वः उडान याइगु विमान कम्पनी खः ।

कम्पनीं विमान सेवाय् थीथी डिजिटल प्रविधि दुत हयाः चीनय् न्यना वनाच्वंगु नागरिक उड्डयन सेवाया मागयात ईयात ल्वःकथं सम्बोधन यानाच्वनागु दावी याःगु दु ।चिनिया नखः स्प्रिङ फेस्टिभलया झ्वलय् जनवरी २१ निसें मार्च १ तकया दुने थ्व विमान कम्पनीं न्हय्गू करोड ३० लाख यात्रुतय्त सेवा बीगु अनुमान चीनया नागरिक उड्डयन प्रशासनं यानाच्वंगु दु । थ्व थगुनेया तुलनाय् १२ प्रतिशतं अप्वः खः ।