ने. सं. ११४४ चौलाथ्व दशमी -

थुगु दँय् निगू थासय् आकाशे ताँ

येँ – येँ महानगरपालिकां आकाशे ताँ निर्माण यायेगु योजनायात मूर्त रुप बीगु जूगु दु । उकिया निंतिं येँ मनपां तत्कालया निंतिं निगू थासय् आकाशे ताँ निर्माण याइगु जूगु दु । येँ मनपां चालु आर्थिक दँया दुने न्हापांगु चरणय् निगू थासय् आकाशे ताँ निर्माण यायेत्यंगु खः ।
येँ मनपाया प्रवक्ता ईश्वरमान डंगोलं बियादीगु जानकारीकथं न्हापांगु चरणय् चाबही व सिंहदरवारस्थित पुरातत्व विभाग न्ह्यःने आकाशे ताँ निर्माण यायेगु तयारी जुयाच्वंगु दु ।

येँ मनपां चालु आर्थिक दँय् च्यागू थासय् आकाशे ताँ दयेकेगु योजना दुगु खःसां तत्कालया निंतिं थुपिं निगू थासय् जक आकाशे ताँ निर्माण यायेगु तयारी याःगु येँ मनपा १५ वडाया वडाअध्यक्षतकं जुयादीम्ह प्रवक्ता डंगोलं कनादिल ।येँ मनपां आः वइगु दिनय् निर्माण याइगु दक्वं आकाशें ताँ आवश्यकताकथं छगू थासं मेगु थासय् याउँक हे ल्ह्ययायंके फइकथंया निर्माण याइगु जुयाच्वंगु दु ।

येँ मनपां टेकू भंसार, पुतलीसतक, कोटेश्वर, त्रिपुरेश्वर, गौशाला, महाराजगंजय् नं आकाशे ताँ निर्माण यायेगु योजना दयेकातःगु दु । सतक दुर्घटना म्हो यायेत नापं ट्राफिक व्यवस्थापन व लँजुवाःतय् निंतिं सहजताया निंतिं येँ मनपां ट्राफिक प्रहरी व सडक विभागया सहकार्यय् उकथंया न्हूगु आकाशे ताँ दयेकेत्यंगु खः ।

सवारी साधनया चाप अप्वः जुइगु थाय्यात लक्षित यानाः येँ मनपां उकथं आकाशे ताँ दयेकेगु योजना न्ह्यःने हःगु खः । उगु योजनाकथं अज्याःगु थासय् लँजुवाःतय्त लँ त्वाःल्हायेत समस्या जुया वयाच्वंगुयात ध्यानय् तयाः आकाशे ताँ दयेकेत्यंगु खः । लँजुवाःतय्सं लाक्वपाक्व थासं लँ त्वाःल्हाइगुलिं सतक दुर्घटनालिसें ट्राफिक जामया समस्या अप्वया वनाच्वंगु दु । लिसें येँ मनपां आः निर्माण याइगु न्हूगु आकाशे ताँय् गुगुं कथंया विज्ञापन तये मदइगु नीति नं न्ह्यःने हःगु दु ।

थौंकन्हय् येँ मनपा दुने लुँहिति, वीर अस्पताल, जमः, रत्नपार्क–बागबजाः, पुलांगु बसपार्क, भद्रकाली व बालाजुइ च्वंगु न्हूगु बसपार्कय् तयातःगु आकाशे ताँ संचालनय् वयाच्वंगु दुसा थुकीमध्ये भद्रकाली, न्हूगु व पुलांगु बसपार्कय् च्वंगु आकाशे ताँ छुं दँ न्ह्यः जक निर्माण याःगुलिं मर्मत यायेमाःगु आवश्यकता मदु । थ्व बाहेकं नं रत्नपार्कय् छगू सब–वे नं संचालन जुयाच्वंगु दु ।