अध्यक्ष वा प्रम त्वःतेत एमाले तयार मदु

येँ – एमालें पार्टी अध्यक्ष व प्रधानमन्त्री निगुलिं सिट मत्वःतेगु संकेत क्यना हयेवं एमाले व माओवादी एकताया लँपुइ पंगः पिहां वःगु दु । एमाले अध्यक्ष केपी ओली व माओवादी अध्यक्ष पुष्पकमल दाहाल दथुइ म्हीग थ्वहे खँय् ताःहाकः वार्ता जूगु खः । तर उकी ओलीं निगुलिं पद थःपिंत हे माः धकाः पार्टी दुने ब्यापक दबाब वयाच्वंगु खँ कना–दीवं एकता वार्ता वयां च्वय् न्ह्याः वने मफुत ।

वार्ता लिपा दिक्क जूम्ह माओवादी अध्यक्ष दाहाल तप्यंक चितवन वनाछ्वःगु दुसा थुकिं यानाः म्हिगः छुं कथंया वार्ता जुइ मफुत । सूत्रतय्सं धाः कथं चितवनय् वनाः दाहालं थः सतीपिं पार्टी नेतातय्त ‘वार्ता न्ह्याः वनाच्वंगु दु तर गति ज्वने मफया–च्वन’ धकाः निराश भावं खँ तयादीगु खः । निम्ह नेताया वार्ताय् ओलीं एमाले तःधंगु पार्टी जूगु कारणं प्रधानमन्त्री व पार्टी अध्यक्ष निगुलिं थःपिंत हे माः धइगु खँय् पार्टीइ यक्व दबाब वयाच्वंगु खँ कनादीगु खः।

माओवादी नेतातय्सं धाःसा चुनाव ल्वानाबलय् हे ६०–४० भागबन्डा यानाः वनागु जुसेंलि एमाले तःधंगु पार्टी जुइगु स्वाभाविक हे खः, अज्याःगु खँयात कयाः जिपिं तःधं धायेगु पाय्छि मजू धयाहःगु दु । सूत्रतय्सं धाः कथं यदि एकीकरण लिपा प्रधानमन्त्री वा पार्टी अध्यक्ष मध्ये छगू पद मबीगु खःसा निगू पार्टी एकीकरण यानाया अर्थ मदु धइगु कथंया मानसिकता माओवादी नेतातय्सं दयेका हयाच्वंगु दु ।

सम्बन्धित बुखँ

LEAVE YOUR COMMENTS