कन्हय् यलय् नेवाः एकता दिवस
येँ – पहिचानया आधारय् प्रदेशया नां तयेमाःगु नापं थीथी कथंया माग यानाः गुक्वःगु नेवाः एकता दिवस हनीगु जूगु दु । गुक्वःगु नेवाः एकता दिवस ग्वसाःखलःपाखें म्हिगः यलय् छगू पत्रकार सम्मेलन यासें थुगुसी कन्हय् मंगलवाः तःजिक नेवाः एकता दिवस यलय् हनेगु जानकारी बिउगु खः ।
नेवाः एकता दिवसया संयोजन यानाच्वंगु नेवाः देय् दबूया नायः नरेश ताम्रकारं पत्रकार सम्मेलनय् झीगु प्रदेशय् झीगु भाय् छ्यले दयेमाःगु, झीगु प्रदेशय् झीगु भासं आखः ब्वने दयेमाःगु, राज्यं यानाच्वंगु थीथी उत्पीडन, विस्थापन अन्त्य जुइमाःगु माग यासें दिवस हनेत्यनागु खँ कनादिल ।
कन्हय् यलया पूच्वंनिसें जुलुस पिकयाः मंगलबजाः हःखाय् थ्यंकाः तःजिगु सभा यायेगु ज्याझ्वः दु । स्वनिगलय् जक मखु स्वनिगलं पिने नं नेवाःतय्सं नेवाः एकता दिवस हनीगु जानकारी नं वय्कलं बियादिल ।
नेवाःतय्सं दँय्दसं पोहेलाथ्व नवःमि कुन्हु नेवाः एकता दिवस हना वयाच्वंगु दु। ने.सं. ११३० पोहेलाथ्व नवमि कुन्हु येँया दशरथ रंगशालाय् लखौं नेवाःत मुनाः नेवाः स्वायत्त राज्य घोषणा याःगु दिंयात लुमंकाः नेवाः एकता दिवस हना वयाच्वंगु खः ।
LEAVE YOUR COMMENTS