विदेशी उद्योगपाखें उत्पादन जूगु वस्तुयात नेपाल गुणस्तर चिं

येँ – नेपाल गुणस्तर तथा नापतौल विभागं नीनिगू विदेशी उद्योगया उत्पादनयात नेपाल गुणस्तर चिं बिउगु दु । विभागं विदेशी उद्योगपाखें उत्पादन जूगु २२ गू उद्योगया नीच्यागू वस्तुयात गुणस्तर चिं बिउगु खः । विभागं भारत व चीनया उद्योगं उत्पादन जूगु वस्तुयात गुणस्तर चिं बिउगु खः ।

विभागं भारतया आधुनिक सिमेन्ट उद्योगं उत्पादन जूग ओपिसी व पिपिसी सिमेन्ट, भारतया हे क्याल्मक सिमेन्ट उद्योगं उत्पादन जूगु ओपिसी व पिपिसी, भारतया हे राजस्थान सिलिण्डर उद्योग उत्पादन जूगु एलपीजी ग्यास सिलिण्डर, एलपीजी भल्ब, भारतया हे अल्ट्राटेक उद्योगं उत्पादन जूगु ओपिसी व पिपिसी सिमेन्ट, बाल्ट्रा एशोसियटपाखें उत्पादन जूगु एलपीजी भल्ब, बेकी स्टीलया आइरन बार, आल्स्टोम सिमेन्ट उद्योगया पीपीसी सिमेन्टयात नेपाल गुणस्तर चिं बिउगु खः ।

थुकथं हे हरि उद्योग प्रा.लि.या एलपीजी रेगुलेटर, दिल्ली एलपीजी उद्योगया उत्पादन एलपीजी भल्ब फिटिङ, ग्यास ड्रोइड इन्जिनियरिंगया एलपीजी ग्यास सिलिण्डरयात नं गुणस्तर चिं बिउगु विभागं चिनिया रेगुलेटर कम्पनी निग्बो सुआई छिनयात नं गुणस्तर चिं बिउगु दु ।

विदेशी वस्तुयात नेपाल गुणस्तर चिं बीगु ज्याया शुरुवात नवीन्द्रराज जोशी उद्योगमन्त्री जुयादीगु इलंनिसें शुरु जूगु खःसा थ्व स्वयां न्ह्यः विदेशी कम्पनीं ताःई न्ह्यवंनिसें नेपालय् हे उत्पादन याना वयाच्वंगु वस्तु व उद्योगयात जक उकथं गुणस्तर चिं बीगु याना वयाच्वंगु खः ।
विभागय् थौंकन्हय् देय् दुने व विदेशया यानाः ख्वीगू वस्तुइ २५० उद्योगपाखें उत्पादन जूगु थीथी ३६९ ताजिया सामग्रीयात गुणस्तर चिं बियातःगु दु ।

विभागया महानिर्देशक विश्वबाबु पुडासैनीं विदेशी मुलुकया उद्योगपाखें नं गुणस्तर चिं कायेगुलिइ अप्वया वनाच्वंगु धासें प्रक्रिया मिले याना वःपिंत बिया वयाच्वनागु स्पष्ट यानादिल ।

सम्बन्धित बुखँ

LEAVE YOUR COMMENTS