ने. सं. ११४४ चौलागा पारू -

यलया पायः जात्राया निंतिं अक्षय कोष

यल – थगुनेनिसें शुरु जूगु पायः (खड्ग) जात्रायात थुगुसी नं निरन्तरता बीगु जूगु दु । जात्रायात निरन्तरता बीगु निंतिं सरोकारावाला निकायया प्रतिनिधि दथुइ सहलहया झ्वलय् थुगुसी नं जात्रायात निरन्तरता बीगु क्वःछिउगु खः ।

यल महानगरपालिका, गुथि संस्थान यल शाखा व ललितपुर उद्योग वाणिज्य संघया दथुइ थुगुसी नं पायः जात्रायात निरन्तरता बीगु नापं जात्रा गुकथं संचालन यायेगु धइगु खँय् सहलह जूगु खः । मुँज्यां पायः जात्रायात निरन्तरता बीगु निंतिं छगू अक्षय कोष नं नीस्वनीगु जूगु दु ।

यल मनपाया प्रमुख चिरिबाबु महर्जनं जात्रायात निरन्तरता बीत छगू अक्षय कोष नीस्वनेगु तयारी जुयाच्वंगु धासें उकिया निंतिं मनपा थम्हं दकलय् अप्वः आर्थिक ग्वाहालि याइगु जूगु दु । थगुने नं जात्राया निंतिं यल मनपा व संघ निगुलिं निकायं निगू लाख न्हय्न्याद्वः तका दां ग्वाहालि याःगु खः ।

वंगु नीप्यदँ न्ह्यवंनिसें दिनाच्वंगु थनया पायः जात्रा थगुनेनिसें संचालनय् वःगु खः । उकिया निंतिं यल मनपां विशेष पहल याःगु खःसा उकियात ललितपुर उद्योग वाणिज्य संघ, ज्यापु समाज यल लगायत आपालं संघसंस्थां नं ग्वाहालि याःगु खः । छुं दँ तक सहकार्य यानाः जात्रा चले यायेगु व वयां लिपा छगू अक्षय कोष दयेकेगु योजना दु ।

सकलें जानाः वन धाःसा जक जात्रा न्ह्याइगु सम्भावना दुगु प्रमुख महर्जनं कनादिल । मोहनिया इलय् जुइगु थ्व जात्रा आर्थिक अभाव लगायतया समस्याया कारणं संचालन जुइ मफुगु खःसा थ्व जात्रा यलया महत्वपूर्ण जात्रा मध्ये छगू खः ।

जात्रायात दीर्घकालीन रुपं संचालनया निंतिं अक्षय कोष नीस्वनेगु व उकी मेमेगु संघसंस्थां नं ग्वाहालि याये फइगु वय्कलं कनादिल ।
वइगु छुं दँ मनपा थम्हं हे समन्वय यानाः जात्रा संचालन याइगु जूगु दुसा वयां लिपा अक्षय कोष नीस्वनाः जात्रा संचालनया निंतिं बिस्कं समिति नं दयेकेगु तयारी जुयाच्वंगु दु ।