सहमतिं जक नां व राजधानी

मतदानपाखें प्रदेशया नामाकरण याये मफइगु विश्लेषण

येँ   – थीथी प्रदेशया नां व स्थायी राजधानी तोके यायेगु ज्या सम्बद्ध प्रदेशय् मतदानपाखें याकेगु संवैधानिक प्रावधान दुसां थ्व ज्या मतदानं मखुसें केन्द्रया राजनीतिक सहमतिया आधारय् हे जक यायेगु खँय् संघ व प्रदेशया नेतात सहमत जूगु खँ सीदुगु दु ।प्रदेशया नां व राजधानी तोके यायेगु ज्या आः प्यंगू प्रदेशय् जक याये ल्यं दनि ।

तर थ्व ज्या आः मतदानया आधारय् यायेबलय् झन् तःधंगु समस्या ब्वलनीगु खने दुगुलिं केन्द्रय् राजनीतिक सहमति कायम यानाः जक न्ह्याके मालीगु खँ न्ह्यःने वःगु खँ सूत्रं धाःगु दु । प्रदेशया नां व स्थायी राजधानी तोके यायेगु ज्या आः प्रदेश नं. १, २, ३ व ५ य् ल्यं दनि ।
मतदानपाखें प्रदेशया नामाकरण व स्थायी राजधानी तोके यायेगु लागिं दुई तिहाइ बहुमत आवश्यक जू ।

तर थ्व प्यंगुलिं प्रदेशय् अथे दुई तिहाइ बहुमत खाके फइगु अवस्था मदु । छुं जुयाः मतदानय् वनाः नं दुई तिहाइ खाके मफु त धाःसा ताः ई तक हे स्थायी राजधानी तोके याये मफइगु जुयाः मतदानय् वनेगु पाय्छि मजुइगु निष्कर्ष नेतातय्सं पिकाःगु खँ धाःगु दु ।

प्रदेशया नां व स्थायी राजधानीया बारे छगू हे पार्टी दुने तकं फरक फरक बिचाः दुगु जुयाः ह्वीप बियाः तक नं निर्णय याके फइगु सम्भावना मदुगु सूत्रया दावी दु । उकिं थुकिया बारे केन्द्रय् राजनीतिक दलतय् दथुइ राजनीतिक सहमति दयेकाः जक न्ह्याः वने माली धासें प्यंगुलिं प्रदेश थौंकन्हय् केन्द्रया ‘निर्णय’ पियाच्वंगु खँ नं धाःगु दु ।

प्रदेश नं. ३ य् आः माघं च्वनीगु चिकुलाया अधिवेशनय् नामाकरण व स्थायी राजधानी सम्बन्धी प्रस्ताव हयेगु धकाः तयारी जुयाच्वंगु दु । तर नेताय् दथुइ सहमति मजुइकं थ्व ज्या मयायेगु खँ पिहां वःगुलिं थ्व अधिवेशनय् नं थुकिया प्रस्ताव मवइगु खँ धाःगु दु ।

निर्णय याये अःपु मजू
प्रदेशया नामाकरण व स्थायी राजधानी तोके यायेगु ज्या तसकं जटिल जूगु विश्लेषण राजनीतिक दलया नेतातय्सं याना हःगु दु । न्हापांगु संविधानसभा भंग जूगुया कारण हे प्रदेशया नां व स्थायी राजधानी तोके याये मफयाः खः धइगु उमिगु विश्लेषण दु । अबले प्रदेशया नां व स्थायी राजधानी तोके यानाः संविधान जारी याःगु जूसा थाय्थासय् मि च्याइगु खतरा पिहां वःगु जुयाः हे संविधान जारी हे मयासे संविधानसभा भंग याना छ्वःगु खः धइगु नं उमिगु विश्लेषण दु ।

उकिं अबलय् ६०१ म्ह सांसदतय्सं ला निर्णय याये मफुगु थ्व विषय आः प्रदेशया छपुचः सांसदतय्सं निर्ण याये फइ मखु धइगु निष्कर्ष प्रदेशया सांसद व मन्त्रीतय्सं पिकया हःगु दु । आः नं हथासं निर्णय जुल धाःसा ग्यानापुगु स्थिति वयेफु धइगु उमिगु ग्याःचिकु दु ।

सम्बन्धित बुखँ

LEAVE YOUR COMMENTS