शपथ सिधयेवं हे हानं ज्वन

येँ – कैलालीं जिल्लां त्याना वःम्ह राजपाया सांसद रेशम चौधरीयात म्हिगः सभामुख कृष्णबहादुर महरां सांसद पदया शपथ ग्रहण याकेवं हाकनं प्रहरीं ज्वना यंकूगु खँयात कयाः आलोचना जूगु दु । येँया डिल्लीबजारस्थित सदर खोरय् कुनातःम्ह वय्कःयात संसद सचिवालय यंकाः सभामुखपाखें शपथ ग्रहण याकूगु खःसा वयां तत्काल हे लिपा हानं प्रहरी वयाः ज्वना नं यंकूगु खः ।

सांसदयात ज्वनेगु लागिं प्रहरीं संसद सचिवालययात जानकारी बियाः सभामुखया अनुमति समेत कायेमाःगु प्रावधान दु । शपथ ग्रहण लिपा थःत ज्वनेगु लागिं प्रहरी वयाच्वंगु खँय् नं न्ह्यसः तसें वय्कलं सांसदया शपथ ग्रहण यायेधुंकाः नं खोरय् वने माःगु ला धकाः न्ह्यसः तयादीगु खः ।

सांसद चौधरीं म्हिगः संसद सचिवालयय् थारू भासं शपथ ग्रहण यानादीगु खः । वय्कःया शपथ ग्रहण ज्याझ्वः स्वयेगु लागिं कलाः व काय नं सचिवालयय् थ्यनाच्वंगु खः । तर शपथ ग्रहण याकेवं हानं ज्वना यंकूगु खनाः धाःसा वय्कःपिं निम्हं निराश जुयादिल ।
सूत्रतय्सं धाः कथं चौधरीया पार्टी राजपां सरकारयात कडा रुपं दबाब बिउगु कारणं म्हिगः वय्कःया शपथ ग्रहण ज्याझ्वः दयेकूगु खः । राजपां संविधान संशोधनया मुद्दायात न्ह्यःने तसें माल धाःसा सरकारयात बिया तयातयागु समर्थन लित काये मालीगु ख्याच्वः समेत बियाच्वंगु दु । उकियात हे सम्बोधन याये कथं सरकारं शपथ ग्रहण याकूगु खः ।

मेखे गुलिखे मनूतय्सं धाःसा उकुन्हु तिनि अदालतं त्वःता हःम्ह डन दिपक मनांगेयात शपथ ग्रहण याकेगु लागिं लुखा चायेकेत सरकारं चौधरीयात निं न्हापां शपथ ग्रहण याकूगु खँ धयाहःगु दु । आपराधिक केसय् ज्वनातःम्ह मनांगेयात शपथ ग्रहण याकाः राजनीतिक केसय् ज्वनातःम्ह चौधरीयात शपथ मनकल धाःसा आलोचना जुइ धकाः सरकारं थ्व नाटक याःगु द्वपं नं वःगु दु ।

सम्बन्धित बुखँ

LEAVE YOUR COMMENTS