कृष्णलालया एमबिए

एमबिए । शिक्षा ख्यलय् थ्व शब्दया अर्थ खः मास्टर्स इन बिजनेश एडमिनिस्ट्रेसन अर्थात ‘बिजनेश एडमिनिस्ट्रेसन’ विषयय् स्नातकोत्तर । तर थौं थन चर्चा यायेत्यनागु शिक्षा ख्यःया थ्व ‘एमबिए’या मखु कि ‘एमबिए’ यायेगु चाहना दयां नं पूवंके मखंम्ह, तर ‘एमबिए’या थुवाः जूवःम्ह छम्ह ल्याय्म्ह व्यवसायी व वय्कःया व्यवसायया खः ।

वय्कः खः— कृष्णलाल महर्जन । अले वय्कःया ‘एमबिए’य् खः— महर्जन विजनेश एशोसियट्स । थौंकन्हय् येँया दकलय् व्यस्त व्यापारिक केन्द्र जुयाच्वंगु न्हूसतकय् तःधंगु लगानीइ नियो–क्लासिक डिजाइनय् छगू सम्पदामैत्री व्यापारिक भवन धस्वाकाच्वंगु दु– महर्जन कम्प्लेक्स । थ्व भवन दयेकाच्वंगु अथवा थ्व भवनया थुवाः खः ‘महर्जन विजनेश एशोसियट्स अर्थात ‘एमबिए’ ।

अले थ्व एमबिएया थुवाः मध्ये छम्ह खः – भाजु कृष्णलाल महर्जन । वय्कः महर्जन विजनेश एशोसिएट्सया अध्यक्ष खः । अले थुकीया मेपिं संचालक थौंकन्हय् जापानया हिरोशिमा युनिभर्सिटीइ प्राध्यापन याना च्वनादीम्ह वय्कःया हे दाजु प्राध्यापक डा. केशवलाल महर्जन व किजा किरणलाल महर्जन खः ।

वय्कःया थ्व ज्यायात सकल महर्जन परिवार व शुभचिन्तक हःपाः व तिबः बिया वयाच्वंगु दु ।थ्व कम्पनीया नां ‘महर्जन विजनेश एशोसियट्स’ गथे जुयाः च्वंवन ? थुकिया कारण भाजु कृष्णलालं जीवनय् पूवंकेमफुगु छगू इच्छा–अभिलाषाय् दुसुलाच्वंगु दु ।

महर्जन परिवार कम्पनीया नां ‘महर्जन विजनेश एशोसियट्स’ गथे जुयाः च्वंवन ? थुकिया कारण भाजु कृष्णलालं जीवनय् पूवंकेमफुगु छगू इच्छा–अभिलाषाय् दुसुलाच्वंगु दु ।

उबलय् नेपालय् नकतिनि नकतिनि एमबिए ब्वंकेगु सुरु जूगु, त्रिचन्द्र कलेजय् साइन्स ब्वनादीम्ह कृष्णलालया पासापिं नं काठमाडांै विश्वविद्यालयया न्हापांगु ब्याचय् एमबिए ब्वनेत वन । वय्कःया नं एमबिए यायेगु छगू तःधंगु इच्छा । तर पारिवारीक व्यवसायय् तक्यंबलय् एमबिए यायेगु इच्छा पूवंके मखन ।

वय्कलं धयादी, ‘जितः थःगु जीवनय् एमबिए याये मखंगु छगू तसकं खट्के जुयाच्वंगु, समयक्रमं छगू कम्पनी चायेके माःगु जुल, अले व कम्पनीया नां हे ‘महर्जन विजनेश एशोसियट्स’ अर्थात चिहाकलं ‘एमबिए’ तयाबिया । थ्व नां जिगु ल्याय्म्हबलय्या छगू अभिलाषा पूवंकेगु नं जुलसा जिगु जातिय गौरवया नां नं जुल ।’

थःगु जातप्रति गौरव यानादीपिं कृष्णलाल व महर्जन परिवारया ‘एमबिए’ थौंकन्हय् चर्चाय् दु । खय्त ला कापःया व्यापार ख्यलय् ‘महर्जन’ धयागु नां न्हापांनिसें हे सम्मानित नां खः । पर्सि व सर्टिङ्ग सुटिङ्गया कापःया बजारय् महर्जन धालकि देश–विदेशय् सकसिनं म्हसिउ । कापः बजाःया क्षेत्रय् थःगु बिस्कं हे नां दुसां महर्जन परिवार धाःसा छुं चर्चाय् मवसे, लोप्रोफाइलय् च्वनाः थःगु व्यापारय् हे लगनशील जुयाः लगे जुयाच्वंगु खः ।

तर आः एमबिए व थ्व कम्पनीं दयेकाच्वंगु ‘महर्जन कम्प्लेक्स’या कारणं महर्जन परिवार देय्न्यंक चर्चाय् दु ।महर्जन कम्प्लेक्सया चर्चा थुकिया नियो–क्लासिक डिजाइन व देय्या हे न्हापांगु सम्पदामैत्री व्यापारिक भवनया कारणं नं जुयाच्वंगु दु । भाजु कृष्णलाल महर्जनया कथं सम्पदामैत्री थ्व भवनया डिजाइनयात कयाः युनेस्कों हे तारिफ यानाः पौ तकं बियाथकूगु दु ।

थ्व भवनया पिनेया डिजाइन बसन्तपूया परम्परागत मौलिक संरचना लिसे ज्वःलाः । वय्कःया कथं थ्व भवन पिनें क्लासिक खनेदुसां दुने धाःसा अत्याधुनिक जुइ । व्यापारिक भवनयात माःगु एलिभेटर, क्याप्सुल लिफ्ट, एस्केलेटर, सुरक्षा व्यवस्था लगायत माःगु फुक्क कथंया सुविधा दइ । भवन दुने नं ताजा फय् कायेखनीकथं व्यवस्था यानातयागु दु ।

लिसें ९ स्केल भुखाय् ब्वःसां छुं मजुइ कथं दयेकाच्वंगु दु । अथेहे चुकया कन्स्टेप्ट तयाः ४० प्रतिशत चुकया निंतिं थाय् त्वःता तःगु दु । छचाखेरं न्हाय्कंया बार तइगु, अले थ्व बारय् नं नेपाःया थीथी कला, संस्कृति, सम्पदा, हिमाल पहाड आदित कियाः ब्वयातःगु दइ ।
थ्व भवन तयार जुइधुंकाः भवनय् दइगु ८० गू पसः पाखें द्वःछिम्हं मल्याकसित लजगा चूलाइगु विश्वास वय्कःया दु ।

समृद्धि झी सकल नेपाःमितय्गु साझा आज्जु खः, थ्व आज्जु पूवंकेगु दिशाय् थ्व भवन नं छगू धिसिलाःगु थां सावित जुइगु वय्कःया भलसा दु ।महर्जन कम्प्लेक्स दयेकाच्वंगु ‘एमबिए’ महर्जन परिवारया व्यवसाययात अझ चकंका यंकेत नीस्वंगु कम्पनी खः । कापः व पर्सिया ब्यापार जक यानाच्वनादीपिं महर्जन परिवार आः थ्व कम्पनी मार्फत जलविद्युत व सूचनाप्रविधि थेंज्याःगु नेपाःयात समृद्धिया लँय् यंकीगु थीथी क्षेत्रय्् नं पलाः तयेगु सोचय् दु ।

थ्व जुल एमबिएया चर्चा, आः एमबिएया थुवाः मध्ये छम्ह, कृष्णलाल महर्जनया चर्चा याये । वय्कःया खँ ल्हायेबलय् वय्कःयात छम्ह हिम्मत व आँट दुम्ह कर्मशील व्यवसायी कथं म्हसिइकेफइ । वय्कःया हे कथं धायेगु खःसा हिम्मत व आँट मदुगु जूसा थ्व महर्जन कम्प्लेक्सं नं आकार काइमखु जुइ ।

छगू परिवारं अर्बौं तका लगानी यानाः छुं नं मेगा प्रोजेक्ट न्ह्याकेगु धाथें आँटया हे खँ खः । ‘दां दुपिंके ज्ञां मदु, ज्ञां दुपिंके दां मदु । नितां दुपिंके आँट मदु’ धायेगु झीगु चलन दु । ‘आँट मदयेकं छुं हे याये फइमखु’ वय्कलं धयादी, ‘व्यापार यायेगु खःसा इमान्दार, कर्मशील ला जुइ हे माल, लिसें आँट नं दयेमाः ।

त्यासा कयाः ज्या यायेमाःसां ज्या याये धयागु आँट दयेकेमाः । जि ला लाकां छजु जक न्यायेमाःसां जिउसा त्यासा कयाः हे न्यायेमाः धयागु बिचाःयाम्ह खः । त्यासा कयाः ज्या यात धाःसा त्यासा पुलेमानी धयागु हुनिं नं लगनशील जुयाः ज्या याइ । लगनशील जुयाः ज्या यात धाःसा मफइ धयागु छुं मदु ।’

वय्कः व वय्कःया परिवारया थ्व हे लगनशीलतां हे छगू सामान्य किसान, बुँ ज्या यानाच्वंपिं ज्यापुया परिवारं न्ह्याकूगु कापःया व्यवसाय देय्न्यंकं न्यनाच्वंगु दु । वय्कःपिनि थ्व व्यवसायया धरोहर धाःसा वय्कःया अबु कर्मलाल महर्जन खः । छम्ह सामान्य ज्यापुया परिवारय् जन्मे जूम्ह कर्मलालं खुइदँ न्ह्यव खिचापुखूया तेज साहुयाथाय् छेँय्या ज्या निसें पसलय् च्वनेगु ज्या यायां थःगु व्यवसायया जग तयेगु ज्या यानादीगु खः ।

तेज साहुयाथाय् झिदँ तक ज्या यायेधुंकाः साहुजुया हे भलसा व तिबः कयाः कर्मलालं थः किजा काजिलाल महर्जन लिसे जानाः थौं स्वयां न्यय्च्यादँ न्ह्यव न्यूरोडय् हे छगू रेडिमेड पसः चायेकादिल । थ्वयां निदँ लिपा विशालबजाः न्ह्यःने मखं गल्ली वनेथाय् ‘महर्जन स्टोर’या नामं सर्टिंग सुटिंग व कापः पसः चायेकादिल ।

जापानीज, इन्डियन पर्सिया होलसेल यानादिल, नांजाःगु सूट कापः मीगु लिसें सूट सुइगु ज्या न्ह्याकादिल । थ्व हे ज्या च्वन्ह्याःवँवं थौं नेपाःया कापःया बजारय् ‘महर्जन’ छगू सम्मानित नां जूवंगु दु । नेपालय् पर्सि, कुर्ता व सर्टिंग सुटिंगया कापःया बजाः धयागु थ्यंमथ्यं मारवाडी व्यापारीतय् कब्जा दु ।

नेवाःत जक मखु गैर नेवाःत तसकं म्हो जक दु । भाजु कृष्णलालं धयादी, ‘पर्सि, कुर्ता व सर्टिंग सुटिंगया होलसेल बजारय् मारवाडी इतरयापिं तसकं म्हो जक व्यापारी मध्ये छखलः जिपिं नं जुइ ।’महर्जन परिवारं एमबिए चायेके न्ह्यव हे ह्युमर, डेस्टिनी इन्टरनेशनल, महर्जन मेकर्स, काठमान्डुइट्सया नामं शुक्रपथ लागाय् शोरुम चायेकातःगु दु ।

ह्युमरं पर्सि, कुर्ता कापःया व्यापार यानाच्वंगु दु, डेस्टिनी इन्टरनेशनल भारतया नांजाःगु ब्राण्ड ‘रेमन्ड’या नेपाःया निंतिं आधिकारिक विक्रेता खः, अथेहे महर्जन मेकर्स भारतया हे मेगु नांजाःगु ब्राण्ड ‘मेकर्स’या आधिकारिक विक्रेता खः । काठमान्डुइट्सं कापः मिइगु लिसें सूट सुइगु ज्या यानाच्वंगु दु ।

थः अबुजुं नीस्वनाथकूगु व्यापारया जगय् थथे तँ तनायंकेगुली दत्तचित्त जुयाच्वनादीम्ह कृष्णलाल च्यागू तगिं ब्वना च्वंगु इलय् निसें अबुया पसलय् च्वनाः व्यापार सयेकादीम्ह खः । उबलय्या खँ लुमंकुसें वय्कलं धयादी, ‘न्हापा फाइनल जाँच क्वचालकि निला ति धयाथें मिनपचास बिदा दइगु ।

थ्व मिनपचास बिदाया निला बाः व माइलबाः काजिलाल व कका प्रकाशचन्द्र महर्जन लिसे वयाः पसलय् च्वं वयेगु । थ्वयां लिपा कलेज सुरु जुल । अमृत साइन्सय् आइएससी ब्वनाच्वनाबलय् नं कलेज सिधयेवं पसलय् हे वयेगु । अथे यायां २०४८ साल तक थ्यंबलय् ला पूवंक पसलय् हे व्यस्त जुल, अथे जूबलय् एमबिए यायेगु इच्छा पूवंकेमफुत ।’

कापः बजाःया क्षेत्रय् थःगु बिस्कं हे नां दुसां महर्जन परिवार धाःसा छुं चर्चाय् मवसे, लोप्रोफाइलय् च्वनाः थःगु व्यापारय् लगे जुयाच्वंगु खः । तर आः एमबिए व थ्व कम्पनीं दयेकाच्वंगु ‘महर्जन कम्प्लेक्स’या कारणं महर्जन परिवार देय्न्यंक चर्चाय् दु ।

नच्चागु वैंशया इलं निसें व्यवसायय् भुले जुयाच्वनादीम्ह वय्कः झी नेपाःमित छुं नं ख्यलय् विश्वय् थःगु म्हसिइका ब्वयेफुगु क्षमता दुपिं खः धयागु खँय् विश्वस्त दु । वय्कलं धयादी, ‘नकतिनि हे जक छम्ह नेपाःमि महेश्वर महर्जन बडि बिल्डिङ्गय् विश्व विजेता जुयादिल । अथेहे झीगु हे ललितपुर पेट्रियट्सया क्रिकेट कासामि सन्दीप लामिछानें विश्व क्रिकेटय् हलचल हयाच्वंगु दु ।

मिस युनिभर्स, मिस वल्र्ड, मिस सुपरा–नेशनल थेंज्याःगु विश्वब्यापी धेंधेंबल्लाखय् नेपाःमित धमाधम च्वन्ह्याः वनाच्वंगु दु । अथेहे व्यावसायिक ख्यलय् नं नेपाःमितय्सं विश्व बजारय् थःत स्थापित यायेफु धयागु खँय् जितः पूर्ण विश्वास दु ।’वय्कलं थुकीयात अझ बः बियाः धयादी, ‘न्हापा कापःया नं व्यवसाय यानादीम्ह विनोद चौधरी थौं विश्वया अर्बपति धनाढ्यतय् झ्वलय् थ्यनेधुंकूगु दु ।

अथेहे मेम्ह नेपाःमि प्रबल गुरुङ्ग नं विश्वस्तरीय फेसन डिजाइनर जुयाः हलिंया फेसन बजारय् च्वन्ह्यानाच्वंगु दु । नेपाःमित विश्वया थीथी देसय् वनाः थःत प्रमाणित याना हे च्वंगु दु । विश्वया कुंकुलामय् वनाः उद्योग, व्यापार, व्यवसायलगायत थीथी ज्याय् तःधंगु उपब्लिध चूलाकाच्वंगु दु ।

देशं पिने वनाः च्वंपिं एनआरएनतय्सं नेपाःयात समृद्धिया लँपुइ न्ह्याकेगु निंतिं थीथी ज्या नं याना वयाच्वंगु दु । कुतः यात धाःसा छाय् सफल मजुइ ? झी नेपाःमियाके नं थ्व क्षमता दु । उकिं ल्याय्म्ह पुस्ता न्हूगु सोच ज्वनाः, थःगु कर्मय् विचलित मजुसे न्ह्याःवन धाःसा अवश्य सफल जुइ ।’

महर्जन परिवार थःगु जातिय गौरवयात नुगल तयाः ज्या याना वयाच्वनादीपिं खः । थौं स्वयां न्यय्दँ न्ह्यव न्हूसतकय् ‘महर्जन स्टोर्स’ धकाः साइन बोर्ड यख्खाना व्यापार यायेगु आँट यानादीम्ह कृष्णलालया हे अबुजु कर्मलाल खः । भाजु कर्मलालं क्यनाथकूगु कर्म हे जीवन खः धयागु धापु व जातिय गौरवताया लँपु वय्कःया छेँजःपिंसं नं न्ह्याका हे यंकाच्वनादीगु दु । अले थ्वहे जातिय गौरवताया लँपुइ लाःगु छगू धरोहर जुइत्यंगु दु– महर्जन कम्प्लेक्स ।

सम्बन्धित बुखँ

LEAVE YOUR COMMENTS