सम्बन्धयात लालमोहर

सन् २०१८ बलिउड फिल्म उद्योगया निंतिं इहिपाया दँ थें हे च्वनाच्वंगु दु । बलिउडया रंगीन संसारया सेलिब्रिटीत छम्ह लिपा मेम्ह इहिपाया बन्धनय् चिना वनाच्वंगु दु । थ्व हे झ्वलय् बलिउडया हाकनं मेपिं निम्ह सेलिब्रिटीया सम्बन्धयात कयाः इमि छेँजःपिंसं लालमोहर तया बिउगु दु । इपिं निम्ह सेलिब्रिटी खः रणवीर कपुर व आलिया भट्ट ।

नायक रणवीरया छेँजःपिंसं आलियायात थःपिनि छेँजःया रुपय् स्वीकार यायेधुंकूगु दुसा उखे आलियाया अबु नांजाःम्ह निर्देशक महेश भट्टं नं रणवीरयात भावी जिलाजंया रुपय् स्वीकार यायेगु संकेत बीधुंकूगु दु । छगू रिपोर्टकथं रणवीर कपुरं आलियालिसेया सम्बन्धयात न्ह्यःने यंकेगु झ्वलय् सामाजिक संजालय् ‘फेमिलि ग्रुप’य् तकं संलग्न यायेधुंकूगु दु ।

रणवीरया फेमिलि ग्रुपय् वया अबु ऋषि कपुर, मां नीतू कपुर व वया केहें रिद्धिमा कपुर साहनी दुथ्यानाच्वंगु थाय् आः आलिया नं थप जूगु दु ।
उखे आलियाया अबु महेशं नं आलिया व रणवीरया डेटिंगयात ग्रीन सिग्नल बिया बिउगु दु । बस् आः थ्व स्वये ल्यं दनि कि इमिगु थ्व सम्बन्ध गन तक न्ह्याइ !