नेमकिपाया ४४ क्वःगु स्थापना दिवस

किपू – नेपाल मजदुर किसान पार्टी किपू नगर समितिया ग्वसालय् पार्टीया ४४ क्वःगु स्थापना दिवस न्यायेकल । किपूया ध्वाखासिइ जूगु ज्याझ्वलय् मूपाहाकथं पार्टीया केन्द्रीय दुजः नापं येँ जिल्ला समितिया नायः नारायण महर्जन झायादीगु खः ।ज्याझ्वलय् नवासें मूपाहां महर्जनं राष्ट्रिय व अन्तर्राष्ट्रिय राजनीतिइ सैद्धान्तिक विचलन व मतभेदया खने दुसां पार्टीया स्थापनाया इतिहास कायम जुयाच्वंगु प्रष्ट यानादिल । नेमकिपां स्थापना याःगु कम्युनिष्ट आन्दोलनया प्रतिष्ठा कायम यानातयेत सफल जूगु वय्कःया धापू दु ।

नेपाःया कम्युनिष्ट पार्टीत पूँजीवादी सरकारय् फँसे जुया वनाच्वंगु द्वपं बियादिसें वय्कलं थज्याःगु इलय् समाजवादया ध्वाँय् उच्चस्तरय् थ्यंकेगु ज्या नेमकिपा याकःचां यानाच्वंगु दावी नं यानादिल । ज्याझ्वलय् किपू नगर समितिया उपाध्यक्ष बुद्धिमान महर्जनं पार्टी स्थापना दिवसया झ्वलय् पार्टीया थप जिम्मेवारी कयाः न्ह्याः वनेमाःगु आवश्यक जूगु विचाः तयादिल । अथे हे नगर समितिया कोषाध्यक्ष विश्वअमर महर्जनं पार्टीया गतिविधि व विचारं देय् व जनताया सेवा यायेत सफल जूगु धासें सकलें सक्रिय रुपं लगे जुयाच्वनेमाःगु खँय् बः बियादीगु खः । किपू नगर समितिया अध्यक्ष हरिकुमार महर्जनया सभापतित्वय् जूगु ज्याझ्वलय् नन्दलाल महर्जन, मधुकर श्रेष्ठपिंसं नं पार्टीया योगदानयात कयाः चर्चा यानादीगु खः ।

सम्बन्धित बुखँ

LEAVE YOUR COMMENTS