गुर्जा हिमाल गःवंपिं च्याम्ह सित

येँ – धौलागिरि हिमाल श्रृंखलाय् लाःगु गुर्जा हिमाल गःवंपिं च्याम्ह आरोहीत सीगु दु । आरोहणय् वंपिं गुम्ह मध्ये च्याम्हेसिया सीम्ह खनेधुंकूगु दुसा छम्ह तनाच्वंगु खँ धाःगु दु । ७२०० मिटर तजाःगु गुजा हिमाल गयेगु निंतिं न्याम्ह कोरियाली व प्यम्ह नेपालीत उखे वंगु खः । हिमाल गःवंपिं सम्पर्कय् मवयेवं मालेगु निंतिं हेलिकप्टर छ्वःगु खः ।

म्याग्दीया सिडिओ लीलाधर अधिकारीं उमित मालेत वंगु हेलिकप्टरं न्हय्म्हेसिया सीम्ह खंकूगु व निम्ह बेपत्ता जुयाच्वंगु खँ धाःगु दु ।
मेखे जिल्ला प्रहरी कार्यालय म्याग्दीया डिएसपी वीरबहादुर बुढामगरं धाःसा हेलिकप्टरं च्याम्हेसिया सीम्ह खंकूगु दु । तर मौसम बांमलाःगु कारणं हेलिकप्टर दिकेमफुगुलिं सीम्ह हयेमफुनिगु खँ धाःगु दु ।

हिमाल आरोहीत बांमलाःगु मौसम व हिमालयय् वःगु च्वापुया चलखय् लानाः सीगु अनुमान यानातःगु दु । उपिं च्वनाच्वंगु टेन्ट गुनाच्वंगु व सीम्ह नं छरपस्ट जुयाच्वंगु खँ धाःगु दु । सीपिं मध्ये ग्वःम्ह नेपाली व ग्वःम्ह कोरियन लाःगु दु धयागु नं सीमदुनि ।

उपिं वंगु असोज १६ गते हिमाल गयेगु निंतिं येँनं उखे वंगु खँ उमित हिमाल गयेक यंकूगु ट्रेकिङ एजेन्सी ट्रेकिङ क्याम्पया प्रबन्ध निर्देशक वाङ्चु शेर्पां धाःगु दु । टे«किङ क्याम्पया कथं गुजा हिमाल आरोहणया निंतिं कोरियाली नागरिकत किम चाङ हो, यु यङ्जिक, रिम इल जिन, ली जेहुन व जेओङ जून मो वंगु खःसा नेपालीत छिरिङ भोटे, लाक्पा साङ्ब, नेत्रबहादुर छन्तेल व फुर्बु भोटे वंगु खः ।