ख्वपया थीथी शक्तिपीठय् मेला

ख्वप – मोहनिया इलय् नःलास्वां पीगु न्हि कौलाथ्व पारुनिसें थनया थीथी शक्तिपीठय् न्ह्याइगु मेला शुरु जूगु दु । दँय्दसं कौलाथ्व पारुनिसें बहनिसिया इलय् थीथी गुंगू शक्तिपीठय् गुचा तक मेला न्ह्याइ । मोहनिज्वःछि गुचा तक चान्हसिया इलय् न्ह्याइगु मेलाया झ्वलय् दकलय् न्हापां ब्रम्हायणीं न्ह्याइगु थ्व मेला निन्हनिसें गुन्हुया चातक छसिकथं माहेश्वरी, कुमारि, भद्रकाली, महाकाली, महालक्ष्मी, इन्द्रायणी, त्रिपुरासुन्दरी व बाराही पीठय् मेला जुइ ।

थ्व झ्वलय् ब्रम्हायणीइ धाःसा नःलास्वां पीगु दिं बहनि व नवमि व दशमिकुन्हु धाःसा न्हिछियंकं मेला जुइ । बहनिसिया इलय् जुइगु मेलाय् शक्तिपीठय् पुजा यायेत व दर्शन यायेत भक्तजनत आपालं वयेगु याः । नवरथयाकथं कयातःगु थ्व मेलाय् मस्त, ल्याय्म्ह ल्यासेनिसें कयाः ज्याथजिथिपिं तकं स्थानीय सांस्कृतिक बाजं थानाः वयेगु याइ ।

नवमिकुन्हु गःछेँय् नवदुर्गा द्यःयाथाय् महिषासुर दैत्यया प्रतीककथं खःम्येय् बलि बीगु चलन दु । थ्व स्वयां न्ह्यः मृत्युवरण याःम्ह नवदुर्गाया गंप्याखं मोहनि शुरु जुइवं हाकनं जीवित जुया वइ धइगु विश्वास दु ।