सरकार खनाः राजपा तम्वल

येँ – राष्ट्रिय जनता पार्टी (राजपांं) सरकारयात बियाच्वंगु समर्थन लित कायेगु ख्याच्वः बिउगु दु । संविधान संशोधनया प्रक्रिया न्ह्याकेगु व मधेस–थरुहट आन्दोलन लिसे सम्बन्धित मुद्दा समाधान यायेगु प्रतिवद्धता बिउगु कारणं राजपां वर्तमान सरकारयात समर्थन याःगु खः । तर उगु प्रतिवद्धता पूमवंगु धासें थःपिंसं बियातःगु समर्थन लित कायेगु ख्याच्वः राजपां बिउगु खः ।

अथेहे राजपां सांसद रेशम चौधरीयात रिहाइ यायेगु ज्याय् नं सरकारं अलमल यानाच्वंगु धासें उकी सरकारया ध्यानाकर्षण यायेधुंकूगु दु ।
राजपां सांसद चौधरीया रिहाई यासें वय्कःयात सपथ ग्रहण याके माल धकाः सरकारयात माग याना वयाच्वंगु खःसां नं उगु मागयात कयाः सरकारं चिउताः मकायेवं सभामुख कृष्णबहादुर महरायात नापलानाः सपथ नकेमाल धकाः इनाप याःगु खँ सीदुगु दु । तर सभामुख महरां प्रधानमन्त्री सकारात्मक जुल धाःसा थम्हं सपथ नकेगु बचं राजपाया नेतातय्त बिउगु खँ स्रोतं धाःगु दु ।

चौधरीयात सपथ नकेगु खँयात कयाः राजपां राष्ट्रपति विद्यादेवी भण्डारीयात नं लापलानाः खँल्हाबल्हा याःगु खँ धाःगु दु । राजपालिसे खँल्हाबल्हा लिपा राष्ट्रपति भण्डारी नं सभामुख महरायात सःताः थुकिया बारे न्यनेकने यानादीगु खँ धाःगु दु ।

मेखे थःपिनिगु मागयात सरकारं सम्बोधन मयाःगु धासें राजपां जिल्ला जिल्लां सरकारयात ज्ञापनपौ बिउगु दु । ज्ञापनपती झुठा मुद्दा तयातःम्ह रेशम चौधरीयात रिहा यायेमाःगु लिसें सपथ ग्रहण याकेमाःगु, लिसें मेपिं थः कार्यकर्तायात बिना सर्त त्वःतेमाःगु माग नं यानातःगु दु । ज्ञापन पतिइ संविधान संशोधनया गम्भीर मुद्दायात वेवास्ता यायेगु ज्यां देय्यात समृद्धि याये फइ मखु धासें गुलि फु उलि याकनं संविधान संशोधन यानाः हाकनं छकः देय्यात आन्दोलनय् वनेगुपाखें बचे यायेमाःगु माग नं यानातःगु दु ।