‘सम्पदा वस्ती पुनःनिर्माण मौलिक जुइमाः’

येँ –  राष्ट्रिय पुनःनिर्माण प्राधिकरणं सम्पदा वस्ती पुनःनिर्माण यायेबलय् उकिया मौलिकतायात ध्यानय् तयेमाःगु खँ धाःगु दु । सम्पदा वस्ती पुनःनिर्माण मौलिक रुपं हे जुइमाःगु खँ चर्चा जुयाच्वंगु इलय् प्राधिकरणं सम्पदा वस्तीया मौलिक पुनःनिर्माण जुइमाःगु खँ धाःगु दु ।
प्राधिकरणया प्रमुख कार्यकारी अधिकृत सुशील ज्ञवालीं बुंग, ख्वना, सक्व थेंज्याःगु थासय् वस्ती पुनःनिर्माण यायेबलय् मौलिक पुनःनिर्माण जुइमाः धासें प्राधिकरणं उकिया निंतिं प्रोत्साहन ज्याझ्वःहयागु खँ धयादीगु दु ।

बुंगमति क्षेत्र पुनःनिर्माण तथा विकास परिषद्या न्हापांगु वार्षिक साधारणसभय् नवासें प्राधिकरणया सीईओ ज्ञवालीं सम्पदा वस्ती दुने लाःगु छेँखा पुनःनिर्माण यायेबलय् मौलिक शैलीइ पुनःनिर्माण यायेमाः धयादिल । लिसें वय्कलं मौलिक शैलीं छेँ दनेत छखा छेँयात न्यय्द्वः तका दां थप ध्यबा प्राप्त जुइगु व थ्व सम्बन्धय् प्राधिकरणं निर्णय नं यायेधुंकूगु जानकारी बियादिल ।

प्रतिनिधिसभा सदस्य पम्फा भुसालं बुंगया कला, संस्कृति व सम्पदाया संरक्षण याये फत धाःसा थुगु क्षेत्रया समृद्धिया सम्भव दु धासें समृद्धिया निंतिं मौलिक वस्ती पुनःनिर्माणय् सकसिनं ग्वाहालि यायेत इनाप यानादिल । लिसें वय्कलं बुंगया सम्पदायात दुथ्याकाः पर्यटकीय चक्रपथ दयेकेगु योजना दुगु जानकारी नं बियादिल ।

प्रदेशसभा सदस्य जीवन खड्कां प्रधानमन्त्रीं बुंग पुनःनिर्माणया गुरुयोजनाया अनावरण यानादीगुलिं उकियात सफल यायेगु ज्याय् स्थानीयवासीतय् भूमिका महत्वपूर्ण जुइ धयादिल ।

परिषद्या अध्यक्ष प्रेमभक्त महर्जनं बुगः लागाया च्यासः स्वयां अप्वःसिनं निजी आवासया निंतिं अनुदान सम्झौता याःगु जानकारी बियादिसें आतकया दुने करिब खुसलं न्हापांगु किस्ता कयाः छेँ दनेगु शुरु यायेधुंकूगु तर निगूगु किस्ता काइपिनिगु ल्याः धाःसा म्हो जुयाच्वंगु धयादिल ।

सम्बन्धित बुखँ

LEAVE YOUR COMMENTS