फास्ट ट्राय्कया डीपीआर कोरियायात

येँ – येँ–निजगढ स्वाइगु फास्ट ट्राय्कया विस्तृत परियोजना प्रतिवेदन (डीपीआर) दयेकेगु जिम्मा दक्षिण कोरियाया कम्पनीयात बिउगु दु । नेपाली सेनां कोरियाया सुसोङ इन्जिनियरिङयात उगु जिम्मा बिउगु खः । डीपीआर दयेकेगु सम्झौताय् मंगलवाः आयोजना प्रमुख लिसें उपरथी योगेन्द्रबहादुर खाँण व कम्पनीया अध्यक्ष किहायन हावाङं हस्ताक्षर यानादीगु खः ।

नेपाली सेनाया कथं डीपीआर दयेकेत १० करोड १२ लाख तुइगु अनुमान यानातःगु दु । डीपीआर स्वलाया दुने क्वचायेकेगु कथं तयारी जुयाच्वंगु दु । थ्व स्वयां न्ह्यः भारतीय कम्पनी आइएल एण्ड एफएसं डीपीआर तयार याःगु खःसा उगु डीपीआरया ध्यबाय् सहमति मजुइवं सेनां डीपीआर न्याये मफइगु खँ धाःगु खः ।

थ्वहे झ्वलय् खोना व बुंगया स्थानीय वासिन्दां अधिग्रहण याःगु जग्गाया क्षतिपूर्ति मगाः धासें विरोधया लिसें सर्वोच्च अदालतय् मुद्दा तयेगु तयारी यानाच्वंगु खँ सीदुुगु दु । मुद्दा तयेगु बारे स्थानीय दथुइ सहलह जुयाच्वंगु दु ।निजगढ विमानस्थलया विवाद ःनिजगढ अन्तर्राष्ट्रिय विमानस्थल दयेकेत सिमा पाले न्ह्यः सिमा पीगु थाय् व योजनाया बारे निश्चित जुइधुंकाः जक सिमा पालेगु बारे निगू मन्त्रालय दथुइ सहमति जूगु दु । वन तथा वातावरण मन्त्रालय व संस्कृति, पर्यटन तथा नागरिक उड्डयन मन्त्रालय दथुइ उगु सहमति जूगु खः ।